പാലക്കാട് : പെരുമണ്ണൂരിൽ ഇടിച്ചു വീഴ്ത്താൻ ശ്രമിച്ച ബസ് തടഞ്ഞു നിർത്തി യുവതി. പാലക്കാട് നിന്ന് ഗുരുവായൂരിലേക്ക് പോകുന്ന രാജപ്രഭ ബസാണ് തടഞ്ഞത്. ബസ് ഓവർ ടേക്ക് ചെയ്യുന്നതിനിടെ ഇരുചക്രവാഹനത്തിലുണ്ടായിരുന്ന സാന്ദ്ര എന്ന യുവതി തലനാരിഴയ്‌ക്കാണ് രക്ഷപ്പെട്ടത്.
അമിത വേഗതയിലായിരുന്ന ബസ് മുന്നിലെ വാഹനം ശ്രദ്ധിക്കാതെ ഓവർടേക്ക് ചെയ്യുകയായിരുന്നു. തുടർന്ന് ഒന്നരകിലോമീറ്ററോളം സാന്ദ്ര എന്ന സ്കൂട്ടർ യാത്രക്കാരി ബസിനെ പിന്തുടർന്ന് തടഞ്ഞുനിർത്തി. മുൻപ് രണ്ടോ മൂന്നോ തവണ സമാനമായ അനുഭവം ഉണ്ടായിട്ടുണ്ട് അതിനാലാണ് പ്രതികരിച്ചത് എന്ന് യുവതി പറഞ്ഞു. വണ്ടി തടഞ്ഞുനിർത്തി സംസാരിച്ചപ്പോൾ ബസ് ഡ്രൈവർ ചെവിയിൽ ഹെഡ്‌ഫോൺ തിരുകിവെച്ചിരിക്കുകയായിരുന്നുവെന്നും സാന്ദ്ര പറഞ്ഞു. സംഭവത്തിൽ ബസിലെ ജീവനക്കാർ ആരും തന്നെ പ്രതികരിച്ചിരുന്നില്ല.
ബസ് തടഞ്ഞ യുവതി നിങ്ങളെ പോലുള്ള വലിയ വാഹനങ്ങൾക്ക് മാത്രം പോയാൽ മതിയോ എന്ന് ചോദിച്ച് ഡ്രൈവറോട് സംസാരിക്കുകയായിരുന്നു. നാട്ടുകാരിൽ ചിലർ പകർത്തിയ ദൃശ്യങ്ങൾ ഇപ്പോൾ സമൂഹമാദ്ധ്യമങ്ങളിൽ പ്രചരിക്കുകയാണ് .
