വാഷിങ്ടണ്‍: ഉത്തര കൊറിയന്‍ ഭരണാധികാരി കിം ജോങ് ഉന്‍ അതീവ ഗുരുതരാവസ്ഥയിലെന്ന് റിപ്പോര്‍ട്ട്. അമേരിക്കന്‍ രഹസ്യാന്വേഷണ വിഭാഗമാണ് ഇത് റിപ്പോര്‍ട്ട് ചെയ്യുന്നത്. ഒരു ശസ്ത്രക്രിയയ്ക്ക് ശേഷമാണ് കിമ്മിന്റെ ആരോഗ്യ നില വഷളായതെന്നും അമേരിക്കന്‍ ഏജന്‍സികള്‍ പറയുന്നു. ഏപ്രില്‍ 15ന് മുത്തച്ഛന്റെ ഓര്‍മ്മ ദിനത്തില്‍ കിം പങ്കെടുത്തിരുന്നില്ല. ഇതോടെയാണ് കിമ്മിനെ കുറിച്ചുള്ള അഭ്യൂഹങ്ങള്‍ തുടങ്ങിയത്. കിം ഒരിക്കലും വിട്ടുകളയാത്ത ചടങ്ങുകളില്‍ ഒന്നായിരുന്നു അത്.
ഏപ്രില്‍ 11ന് വര്‍ക്കേഴ്‌സ് പാര്‍ട്ടി പൊളിറ്റ് ബ്യൂറോയിലാണ് കിം അവസാനമായി പങ്കെടുത്തത്. ഈ യോഗത്തിന് ശേഷമാണ് കിം ചികിത്സക്ക് തിരിച്ചത്. അമിതമായ പുകവലിയും മാനസിക സമ്മര്‍ദ്ദവുമാണ് രോഗം മൂര്‍ച്ഛിക്കാന്‍ കാരണമെന്നും മൗണ്ട് പിക്ടുവിലേക്കുള്ള നിരന്തര യാത്രകളും കിമ്മിന് തിരിച്ചടിയായെന്ന് ഡെയ്‌ലി എന്‍കെ റിപ്പോര്‍ട്ട് ചെയ്യുന്നു. എന്നാല്‍ വാര്‍ത്തകള്‍ സംബന്ധിച്ച്‌ പ്രതികരിക്കാന്‍ ഉത്തരകൊറിയ തയ്യാറായിട്ടില്ല. നിയന്ത്രണമില്ലാത്ത പുകവലിയും അമിത വണ്ണവും ജോലി കൂടുതലുമായിരുന്നു ആരോഗ്യ പ്രശ്‌നങ്ങള്‍ക്ക് കാരണം. ഹ്യന്‍ഗസ്സനിലെ വില്ലയിലാണ് ഇപ്പോള്‍ കിം ചികില്‍സയിലുള്ളതെന്നാണ് റിപ്പോര്‍ട്ടുകള്‍.
