തിരുവനന്തപുരം: ബാറുടമകൾക്ക് പാരിതോഷികങ്ങൾ വാഗ്ദാനംചെയ്ത് മദ്യക്കമ്പനികൾ. ഓണക്കച്ചവടത്തിൽ തങ്ങളുടെ പ്രത്യേകയിനം ബ്രാൻഡുകളെ പ്രോത്സാഹിപ്പിക്കുന്നതിനാണ് ഈ വ്യത്യസ്തമായ നടപടി. കുപ്പിയോടെ മദ്യംവിൽക്കാൻ കോവിഡിന്റെ പശ്ചാത്തലത്തിൽ ബാറുകൾക്ക് അനുമതി നൽകിയതു മുതലെടുത്താണ് ഈ വാഗ്ദാനം. മദ്യംവിറ്റാൽ ബാറുടമയ്ക്ക് സ്വർണനാണയം ഉൾപ്പെടെയുള്ള സമ്മാനങ്ങളാണ് പാരിതോഷികങ്ങളായി നല്‍കുന്നത്. അതോടൊപ്പം വിൽപ്പന കൂടുന്നതനുസരിച്ച് പാരിതോഷികങ്ങളുടെ എണ്ണവും കൂടുമെന്നാണ് പറയുന്നത്.
കുപ്പിയോടെ മദ്യംവിൽക്കാനുള്ള അനുമതി ബിവറേജസ്, കൺസ്യൂമർ ഫെഡ്ഷോപ്പുകൾക്കു മാത്രമുണ്ടായിരുന്നപ്പോൾ മദ്യക്കമ്പനികൾക്ക് ഇത്തരം ഇടപെടലുകൾക്ക് അവസരമുണ്ടായിരുന്നില്ല. എന്നാല്‍ ഇത് ഒരുപരിധിവരെ ബിവറേജസ് കോർപ്പറേഷൻ നിയന്ത്രിച്ചിരുന്നു. ഇത്തരം ക്രമക്കേടുകള്‍ കണ്ടെത്താൻ ബിവറേജസിന് പ്രത്യേക വിജിലൻസ് സ്‌ക്വാഡുമുണ്ട്.
അതേസമയം പുതിയ ക്രമീകരണത്തിലൂടെ ചില്ലറ മദ്യവിൽപ്പനയുടെ 70 ശതമാനവും ബാറുകളിലൂടെയായി. ഇതാണ് മദ്യക്കമ്പനികൾക്ക് ഇടപെടാൻ അവസരം നൽകിയത്. ബാറുകളിൽ ഏത് മദ്യം വിൽക്കണമെന്നു തീരുമാനിക്കാനുള്ള അവകാശം ഉടമയ്ക്കുണ്ട്. ഇവിടെയാണ് ഇപ്പോള്‍ മദ്യക്കമ്പനികളുടെ ഇടപെടൽ.
ബെവ്ക്യൂ ടോക്കൺവഴി ബുക്കുചെയ്യുന്നവർക്കു മാത്രമേ മദ്യം നൽകാവൂ എന്നാണു നിബന്ധന. ബിവറേജസ്, കൺസ്യൂമർഫെഡ് ഷോപ്പുകളിലെല്ലാം ഇതു പാലിക്കുമ്പോൾ ഏറെ ശതമാനം ബാറുകളിലും ടോക്കണില്ലാതെ മദ്യംനൽകുന്നുണ്ട്.
അതേസമയം പഞ്ചനക്ഷത്ര ഹോട്ടലുകളുടെ ഭാഗമായ ബാറുകൾ ഒഴികെയുള്ളവ കുപ്പിയോടെ മദ്യം വിൽക്കുന്നുണ്ട്. പൊതുമേഖലയിൽ തന്നെ 306 വിൽപ്പനകേന്ദ്രങ്ങളുള്ളപ്പോൾ 570 ബാറുകൾക്കാണ് മദ്യവിൽപ്പനയ്ക്ക് അനുമതിയുള്ളത്.
