പത്തനംതിട്ട: ശബരിമലയിൽ അയ്യപ്പഭക്തർക്കായി തിരുവിതാംകൂർ ദേവസ്വം ബോർഡ് ഓൺലൈൻ വഴിപാട് ബുക്കിംഗ് സൗകര്യം ഒരുക്കുന്നു . തിരുവിതാംകൂർ ദേവസ്വം ബോർഡിൻ്റെ കീഴിലുള്ള ക്ഷേത്രങ്ങളിൽ വഴിപാടുകൾ ഓൺ ലൈൻ സംവിധാനത്തിലാക്കുന്നതിൻ്റെ ആദ്യപടിയായാണിത്. വിഷു പൂജകൾക്കായി ശബരിമല നട തുറക്കുന്ന പതിനാലാം തീയതി മുതൽ പതിനെട്ടാം തീയതി വരെ 8 വഴിപാടുകൾ ഭക്തർക്ക് ഓൺലൈനായി ബുക്ക് ചെയ്യാനുള്ള സൗകര്യം തിരുവിതാംകൂർ ദേവസ്വം ബോർഡ് ഏർപ്പെടുത്തിയിട്ടുണ്ട്.ഭക്തർക്ക് www.onlinetdb.com എന്ന പോർട്ടലിലൂടെ വഴിപാടുകൾ ഓൺലൈനായി ബുക്ക് ചെയ്യാവുന്നതാണ്.നീരാഞ്ജനം,നെയ് വിളക്ക്, അഷ്ടോത്തര അർച്ചന, സഹസ്രനാമ അർച്ചന,സ്വയംവരാർച്ചന, നവഗ്രഹ നെയ്യ് വിളക്ക്, ഗണപതി ഹോമം, ഭഗവതിസേവ എന്നീ 8 വഴിപാട് ഇനങ്ങൾ ഭക്തർക്ക് ഓൺലൈൻ വഴി ബുക്ക് ചെയ്യാം. വഴിപാടുകൾ ബുക്ക് ചെയ്യുന്ന പോർട്ടൽ വഴി നിലവിൽ ബുക്കിംഗ് ആരംഭിച്ചിട്ടുള്ളതാണ്. കൂടാതെ,ഭക്തർക്ക് ഓൺലൈനായി കാണിക്ക ( ഇ- കാണിക്ക) അർപ്പിക്കുന്നതിനും, അന്നദാന സംഭാവന നൽകുന്നതിനുമുള്ള സൗകര്യം കൂടി ഉടൻതന്നെ ഈ പോർട്ടലിൽ ഉൾക്കൊള്ളിക്കും. അന്നദാന സംഭാവനകൾക്ക് ആദായ നികുതി ഇളവ് ലഭിക്കും. ഇൻറർനെറ്റ് ബാങ്കിംഗ് വഴി ഭക്തർക്ക് നേരിട്ടും കാണിക്ക, അന്നദാനം സംഭാവനകൾ നൽകാവുന്നതാണ്. കാണിക്ക, അന്നദാനം എന്നിവ ഭക്തർക്ക് യഥാക്രമം ധനലക്ഷ്മി ബാങ്കിൻ്റെ 012600100000019, 012601200000086 എന്നീ അക്കൗണ്ടുകൾ വഴി സമർപ്പിക്കാം.