തിരുവനന്തപുരം: കൊവിഡ് ഡാറ്റാ ശേഖരണത്തിനായി സര്‍ക്കാര്‍ നിയോഗിച്ച സ്പ്രിംക്ലര്‍ കമ്പനിക്ക് കുത്തക മരുന്ന് കമ്പനിയായ ഫൈസറുമായി ബന്ധമുണ്ടെന്നതിന്റെ തെളിവുകള്‍ പുറത്ത്. കൊവിഡിനായി മരുന്ന് കണ്ടെത്താന്‍ ശ്രമം നടത്തുന്ന ഫൈസറുമായി സ്പ്രിംക്ലറിന് വര്‍ഷങ്ങളുടെ ഇടപാടുണ്ട്. കേരളത്തില്‍ നിന്നുള്ള വിവരങ്ങള്‍ സ്പ്രിംക്ലര്‍ വഴി ചോരുമെന്ന ആക്ഷേപം ഉയരുമ്പോഴാണ് മരുന്നു കമ്പനിയുമായുള്ള ബന്ധം പുറത്തുവരുന്നത്.
ഫാര്‍മസ്യൂട്ടിക്കല്‍ രംഗത്തെ ആഗോളഭീമന്മാരായ അമേരിക്കന്‍ കമ്പനിയാണ് ഫൈസര്‍. ഫൈസറിന്റെ സോഷ്യല്‍ മീഡിയ സഹായിയാണ് സ്പ്രിംക്ലര്‍. വിവിധ സോഷ്യല്‍ മീഡിയ പ്ലാറ്റ്‌ഫോമുകളില്‍ കമ്പനിയുടെ ബ്രാന്റ് മൂല്യം വര്‍ധിപ്പിക്കുക, മെച്ചപ്പെട്ട ഉപഭോകൃത ബന്ധത്തിന് സഹായിക്കുകയ തുടങ്ങിയ കാര്യങ്ങളിലാണ് സ്പിംക്ലറും ഫൈസറും തമ്മിലുള്ള സഹകരണം
2014 മുതല്‍ ഫൈസറും സ്പ്രിംക്ലറും തമ്മില്‍ ഇടപാടുകള്‍ ഉണ്ട്. ഇരു കമ്പനികളും തമ്മിലെ സഹകരണം സ്പ്രിംക്ലര്‍ സിഇഒ റാഗി തോമസും ഫൈസറിന്റെ സോഷ്യല്‍ മീഡിയാ ചുമതലയുള്ള സാറാ ഹോളിഡേയും പല വേദികളിലും എടുത്ത് പറയുന്നുണ്ട്. വിവരശേഖരണത്തിന് സ്പ്രിംക്ലറിന്റെ സഹായം തേടിയതായി ഫൈസറും സമ്മതിക്കുന്നുണ്ട്.
