മുംബൈ : രാജ്യത്തെ ഏറ്റവും വലിയ ചേരിയായ മുംബൈ ധാരാവിയില്‍ കോവിഡ് പടർന്നത് കേരളത്തിൽ നിന്നെത്തിയ മലയാളിയിൽ നിന്നാണെന്ന് മുംബൈ പൊലീസ്. കോവിഡ് മൂലം മരിച്ച 56 വയസുകാരന് വൈറസ് ബാധിതനായത് കേരളത്തില്‍ നിന്നെത്തിയ മലയാളികളില്‍ നിന്നാണെന്നാണ് പൊലീസ് പറയുന്നത്.
തബ്‌ലീഗ് സമ്മേളനം കഴിഞ്ഞെത്തിയ ചില മലയാളികള്‍ മുംബൈയില്‍ എത്തിയ ശേഷമാണ് കേരളത്തിലേക്ക് യാത്ര തിരിച്ചത്. മുംബൈയില്‍ ഇവര്‍ ധാരാവിയിലാണ് താമസിച്ചത്. മരിച്ചയാള്‍ വാടകയ്ക്ക് നല്‍കിയ വീട്ടിലാണ് ഇതില്‍ പത്തുപേര്‍ കഴിഞ്ഞത്. ഇവരില്‍ നാലുപേര്‍ മലയാളികളാണ്. ഇവിടെ വച്ചുള്ള സമ്പര്‍ക്കത്തിലൂടായാവാം രോഗം പകര്‍ന്നതെന്നാണ് പൊലീസിന്റെ നിഗമനം. എന്നാൽ ധാരാവിയില്‍ എത്ര മലയാളികള്‍ എത്തിയിട്ടുണ്ടെന്ന് വ്യക്തമല്ല. വിവരം കേരള സര്‍ക്കാരിനെ അറിയിച്ചിട്ടുണ്ടെന്നും അവരെ കണ്ടെത്തണമെന്ന് ആവശ്യപ്പെട്ടതായും പൊലീസ് പറഞ്ഞു. മലയാളികള്‍ ധാരാവിയില്‍ എത്തിയത് എന്തിനാണെന്ന് അന്വേഷിക്കുമെന്നും ഇവര്‍ കേരളത്തിലെ ഏത് ജില്ലയിലേക്ക് പോയതെന്ന് അറിയില്ലെന്നും പൊലീസ് വ്യക്തമാക്കി.
