സ്വരം കടുപ്പിച്ച് അമേരിക്ക.20 വര്‍ഷത്തിനിടെ ചൈനയില്‍ നിന്ന്പിറന്നത് അഞ്ച് പകര്‍ച്ചവ്യാധികള്‍; ഇത് ഇനിയും സഹിക്കാനാകില്ലെന്ന് യുഎസ്

ചൈനയില്‍ നിന്ന് 20 വര്‍ഷത്തിനിടെ പൊട്ടിപ്പുറപ്പെട്ടത് അഞ്ച് പകര്‍ച്ചവ്യാധികളാണെന്നും ഇത് അവസാനിപ്പിക്കണമെന്നും യുഎസ്.ചൈനയില്‍ നിന്നുള്ള പകര്‍ച്ചവ്യാധികള്‍ സഹിക്കാനാകില്ലെന്ന് ലോകം വിളിച്ചുപറയണമെന്ന് യുഎസ് സുരക്ഷാ ഉപദേഷ്‍ടാവ് റോബര്‍ട്ട് ഒബ്രയാന്‍ പറഞ്ഞു.
ആഗോളതലത്തില്‍ രണ്ടേമുക്കാല്‍ ലക്ഷത്തിലേറെ ആളുകളെ കൊന്നൊടുക്കിയ കൊവിഡ്-19 മഹാമാരിക്ക് പിന്നിലും ചൈനയാണെന്നാണ് യുഎസ് നേരത്തെ ആരോപിക്കുന്നത്. ചൈനയിലെ വുഹാനില്‍ നിന്നാണ് കൊറോണ വൈറസ് വന്നതെന്ന് ഞങ്ങള്‍ക്കറിയാം. അവിടത്തെ ലാബോ മാര്‍ക്കറ്റോ ആണ് വൈറസിന്‍റെ ഉറവിടമെന്നതിന് തെളിവുകളുണ്ടെന്നാണ് ഞാന്‍ കരുതുന്നത്. എന്തായാലും വൈറസിന്‍റെ ഉറവിടം ചൈന തന്നെയാണ്. – ഒബ്രയാന്‍ പറഞ്ഞു

വൈറസിന്‍റെ ഉറവിടം ഏത് തന്നെയായാലും ചൈനയില്‍നിന്ന് പകര്‍ച്ചവ്യാധികള്‍ പടരുന്നത് ഇനിയും അംഗീകരിക്കാനാകില്ല. ആഗോളതലത്തില്‍ ഇക്കാര്യം ചര്‍ച്ചയാകുന്നുണ്ട്. ചൈനയില്‍ നിന്നുള്ള പകര്‍ച്ചവ്യാധികള്‍ നിയന്ത്രിക്കേണ്ടിയിരിക്കുന്നു.
സാര്‍സ്, ഏവിയന്‍ ഫ്ലൂ, സ്വൈന്‍ ഫ്ലൂ എന്നിവയും ചൈനയില്‍ നിന്ന് 20 വര്‍ഷത്തിനിടയില്‍ ലോകത്ത് വ്യാപിച്ചവയാണ്. ഇപ്പോള്‍ കൊവിഡ്-19 ലോകം മുഴുവന്‍ പടര്‍ന്നിരിക്കുന്നു. എന്നാല്‍ അഞ്ചാമത്തെ പകര്‍ച്ചവ്യാധി ഏതെന്ന് ഒബ്രയാന്‍ വെളിപ്പെടുത്തിയില്ല.
ചൈന കാരണം പൊതുജനാരോഗ്യം തകരുന്നത് ഇനിയും അനുവദിക്കാനാകില്ല. ഇത് അവസാനിപ്പിച്ചേ മതിയാകൂ. ചൈനയിലേക്ക് ആരോഗ്യ വിദഗ്‍ധരെ അയക്കാമെന്ന് യുഎസ് പറഞ്ഞതാണ്. എന്നാല്‍ അവര്‍ അത് നിരസിക്കുകയായിരുന്നുവെന്നും ഒബ്രയാൻ പറഞ്ഞു.