ദില്ലി: പ്രധാനമന്ത്രി നരേന്ദ്രമോദിയുടെ അടുത്ത വർഷത്തെ ആദ്യ വിദേശയാത്ര യുഎഇയിലേക്ക്. ജനുവരിയിൽ നടത്തുന്ന സന്ദർശനത്തിൽ ദുബായ് എക്സോപിയിൽ മോദി പങ്കെടുക്കും. ഇതിനൊപ്പം യുഎഇയിലെ ഭരണ പ്രതിനിധികളുമായും മോദി ചർച്ച നടത്തും. സ്വാതന്ത്ര്യത്തിന്റെ 75-ാം വാർഷികാഘോഷങ്ങളുടെ ഭാഗമായി ഇന്ത്യയുടെ നേട്ടങ്ങൾ പ്രദർശിപ്പിക്കുന്ന 4 നിലകളുള്ള കൂറ്റൻ പവലിയനാണ് ദുബായ് എക്സോപിയിൽ ഇന്ത്യ ഒരുക്കിയത്. ഇതിനകം നാല് ലക്ഷത്തിലധികം പേർ ഈ പ്രദർശനം സന്ദർശിച്ചു.
നേരത്തെ 2015, 2018, 2019 എന്നീ വർഷങ്ങളിൽ മോദി യുഎഇ സന്ദർശിച്ചിട്ടുണ്ട്. രാജ്യത്തെ ഉയർന്ന സിവിൽ ബഹുമതിയായ ഓർഡർ ഓഫ് സയിദും മോദിക്ക് ലഭിച്ചിട്ടുണ്ട്. വിദേശകാര്യ മന്ത്രി ഡോ. എസ്. ജയശങ്കര് ഈ മാസം ആദ്യം ദുബായ് എക്സ്പോയിലെ ഇന്ത്യന് പവലിയന് സന്ദര്ശിച്ചിരുന്നു.