സീതത്തോട്∙ ശബരിമലയിലെ ഉൾവനങ്ങളിൽ നിന്ന് സർക്കാർ ളാഹക്ക് സമീപം മഞ്ഞത്തോട്ടിലും പൂങ്കാവനത്തിലും പുനരധിവസിപ്പിച്ച വനവാസികൾ രൂക്ഷമായ കുടിവെള്ള ക്ഷാമത്താൽ വലയുന്നു. എല്ലാ സൗകര്യങ്ങളും ഒരുക്കാമെന്നു പറഞ്ഞാണ് ഇവരെ ഉൾവനത്തിൽനിന്ന് ഇവിടെ എത്തിച്ചത്. പ്രാഥമിക ആവശ്യങ്ങൾക്ക് പോലും കുടിവെള്ളം ലഭ്യമല്ലാത്ത അവസ്ഥയിൽ വനവാസികൾ അമർഷത്തിലാണ്.
ശബരിമലയ്ക്കു പോകുംവഴിയിൽ പെരുനാട് പഞ്ചായത്തിലെ ളാഹ മഞ്ഞത്തോട്, പൂങ്കാവനം പ്രദേശത്തു തമ്പടിച്ച ആദിവാസികളുടെ ദയനീയ അവസ്ഥ അധികൃതർ അറിഞ്ഞിട്ടും മുഖം തിരിക്കുകയാണ്. ട്രൈബൽ വകുപ്പും പഞ്ചായത്ത് അധികൃതരും വിഷയത്തോട് പ്രതികരിക്കാത്തത് പ്രതിസന്ധി സൃഷ്ടിക്കുന്നു. മഞ്ഞത്തോട്ടിൽ വനത്തിൽ ഉണ്ടായിരുന്ന ഓലിയായിരുന്നു പ്രധാന ജല സ്രോതസ്. വേനലിന്റെ തീവ്രതയിൽ ഓലി വറ്റി വരണ്ടു. ളാഹ നിവാസികൾക്കു വെള്ളം എത്തിക്കാൻ വനം സംരക്ഷണ സമിതിയുടെ നേതൃത്വത്തിൽ പ്രവർത്തിക്കുന്ന വളഞ്ഞങ്ങാനം ജലവിതരണ പദ്ധതിയുടെ കുളത്തിനു സമീപം ഓലി നിർമിച്ച് ഇതിൽ നിന്നാണ് ആദിവാസി കുടുംബങ്ങൾ ഇപ്പോൾ വെള്ളം ശേഖരിക്കുന്നത്.
വനത്തിലെ മിക്ക നീർച്ചാലുകളും വറ്റിയതോടെ വന്യമൃഗങ്ങളും വെള്ളം കുടിക്കാൻ വളഞ്ഞങ്ങാനത്തുള്ള കുളത്തിലാണ് എത്തുന്നത്. പകൽ സമയത്തും കാട്ടാനകൾ അടക്കം എത്താറുണ്ടെന്നാണ് ആദിവാസികളുടെ സാക്ഷ്യം. വെള്ളം ശേഖരിക്കാൻ പോയവർ ആനയുടെ കൺമുൻപിൽനിന്ന് തലനാരിഴയ്ക്കു രക്ഷപ്പെട്ട സംഭവങ്ങളും അനവധി. വനവാസികളോടുള്ള സർക്കാർ അവഗണനക്കെതിരെ പ്രതിഷേധം ശക്തമാവുകയാണ്.
