കൊല്ലം: യുവ ഡോകട്ർ വന്ദനദാസിനെ കുത്തിക്കൊലപ്പെടുത്തിയ കേസില് ഇന്ന് കുറ്റപത്രം സമര്പ്പിക്കും. കൊട്ടാരക്കര ജുഡീഷ്യല് ഫസ്റ്റ്ക്ലാസ് മജിസ്ട്രേറ്റ് കോടതിയിൽ കൊല്ലം റൂറല് ക്രൈംബ്രാഞ്ച് ഡിവൈഎസ്പി എംഎം ജോസാണ് കുറ്റപത്രം സമര്പ്പിക്കുക. പ്രതിക്കെതിരെ എല്ലാതെളിവുകളും ശേഖരിച്ചശേഷമാണ് 83 -ാം ദിവസം അന്വേഷകസംഘം കുറ്റപത്രം സമര്പ്പിക്കുന്നത്. 26 മുറിവാണ് വന്ദനയുടെ ശരീരത്തിലുണ്ടായിരുന്നത്. കൊലപാതകം, കൊലപാതക ശ്രമം, ആശുപത്രിയില് കലാപവും അക്രമവും നടത്തല് എന്നിങ്ങനെയുള്ള കുറ്റങ്ങളാണ് പ്രതിക്കെതിരെ ചുമത്തിയിട്ടുള്ളത്.
അസീസിയ മെഡിക്കല് കോളജിലെ മെഡിക്കല് വിദ്യാർത്ഥിനിയും താലൂക്കാശുപത്രിയിലെ ഹൗസ് സര്ജനുമായ വന്ദനദാസിനെ കൊട്ടാരക്കര താലൂക്കാശുപത്രിയില് വച്ച് പൊലീസ് ചികിത്സയ്ക്ക് എത്തിച്ച സന്ദീപ് മെയ് 10ന് പുലര്ച്ചെ 4.30നാണ് ആക്രമിച്ച് കൊലപ്പെടുത്തിയത്. സന്ദീപിന് മാനസിക പ്രശ്നങ്ങളൊന്നുമില്ലെന്ന് തെളിയിക്കുന്ന ഒട്ടേറെ ഡോക്ടര്മാരുടെയും വിദഗ്ധരുടെയും റിപ്പോര്ട്ട് കുറ്റപത്രത്തില് ഉണ്ട്.
