ആലപ്പുഴ: ജഡ്ജിയുടെ വാഹനം തടയുകയും ഡ്രൈവറെ ചീത്ത വിളിക്കുകയും ചെയ്ത കോൺഗ്രസ് പ്രാദേശിക നേതാവ് അറസ്റ്റിൽ. ആലപ്പുഴ കോൺഗ്രസ് നോർത്ത് ബ്ലോക്ക് പ്രസിഡന്റ് കെ.എ സാബുവാണ് അറസ്റ്റിലായത്. ഇയാളെ വൈദ്യപരിശോധനയ്ക്ക് ശേഷം കോടതിയിൽ ഹാജരാക്കും.
കഴിഞ്ഞ ദിവസമായിരുന്നു കേസിനാസ്പദമായ സംഭവം നടന്നത്. മോട്ടോർ വെഹിക്കിൾ ക്ലെയിംസ് ട്രൈബ്യൂണൽ ജഡ്ജിയുടെ വാഹനമാണ് പുന്നമടയിൽ വച്ച് സാബു തടഞ്ഞുനിർത്തിയത്. ജഡ്ജിയെ വീട്ടിൽ കൊണ്ടുവിട്ട ശേഷം കാറുമായി മടങ്ങുകയായിരുന്നു ഡ്രൈവർ. പുന്നമടയിൽവച്ച് ഗട്ടർ ഒഴിവാക്കാനായി വലതുവശത്ത് കൂടിയായിരുന്നു ഡ്രൈവർ കാറുമായി നീങ്ങിയത്. അതേസമയം, ഇതേ വശത്ത് കൂടി ഇരുചക്രവാഹനത്തിൽ സാബുവും വരികെയായിരുന്നു. കാർ നേരെ വരുന്നതു കണ്ട സാബു സ്‌കൂട്ടർ കുറുകെ നിർത്തി തടയുകയായിരുന്നു. വണ്ടി മാറ്റാൻ ഡ്രൈവർ പറഞ്ഞതോടെ സാബു അസഭ്യം പറയുകയും ഇതോടെ ഡ്രൈവർ പോലീസിൽ പരാതി നൽകുകയായിരുന്നു.
