ശബരിമല ദർശനത്തിന് കാത്തിരിക്കുന്ന അയ്യപ്പഭക്തർക്ക് ആശ്വാസം; വെർച്വൽ ക്യൂ ബുക്കിംഗ് ഒക്ടോബർ 29 മുതൽ ആരംഭിക്കുന്നു!
മണ്ഡല-മകരവിളക്ക് മഹോത്സവത്തിനായി കാത്തിരിക്കുന്ന കോടിക്കണക്കിന് അയ്യപ്പഭക്തർക്കായി ശബരിമല വെർച്വൽ ക്യൂ ബുക്കിംഗ് ഒക്ടോബർ 29 വ്യാഴാഴ്ച രാവിലെ 10 മണി മുതൽ ആരംഭിക്കും. തിരുവിതാംകൂർ ദേവസ്വം ബോർഡിന്റെ ഔദ്യോഗിക വെബ്‌സൈറ്റായ www.sabarimalaonline.org വഴിയാണ് ദർശനത്തിനായുള്ള സ്ലോട്ടുകൾ ബുക്ക് ചെയ്യേണ്ടത്. മുൻകൂട്ടിയുള്ള ആസൂത്രണത്തിലൂടെ പമ്പയിലും സന്നിധാനത്തും എത്തുന്ന സ്വാമിമാർക്ക് സുഗമമായ ദർശന സൗകര്യം ഉറപ്പാക്കാനും, വലിയ തിരക്ക് കാരണം ഭക്തർ നേരിടുന്ന അസൗകര്യങ്ങൾ ഒഴിവാക്കാനും ലക്ഷ്യമിട്ടാണ് വെർച്വൽ ക്യൂ സംവിധാനം കാര്യക്ഷമമായി നടപ്പിലാക്കുന്നത്.
ദർശനത്തിനായി എത്തുന്ന ഭക്തർക്ക് കൃത്യമായ മാനദണ്ഡങ്ങളോടെയാണ് പ്രവേശനം അനുവദിക്കുന്നത്. നിലയ്ക്കൽ – പമ്പ പാത വഴി അറുപതിനായിരം ഭക്തർക്കാണ് ഒരു ദിവസം വെർച്വൽ ക്യൂ ടിക്കറ്റ് ബുക്ക് ചെയ്യാവുന്നത്. എരുമേലി കാനനപാത വഴി 3000 ഭക്തർക്ക് ദിവസവും ഓൺലൈൻ ടിക്കറ്റ് ലഭിക്കും. വണ്ടിപ്പെരിയാർ- സത്രം പാത വഴിയുള്ള ഓൺലൈൻ ബുക്കിംഗ് ദിവസേന 3000 ആണ്. ഇത് കൂടാതെ നിലയ്ക്കൽ, എരുമേലി, വണ്ടിപ്പെരിയാർ എന്നിവിടങ്ങളിൽ റിയൽ ടൈം സ്പോട്ട് ബുക്കിംഗ് കേന്ദ്രങ്ങളും ഉണ്ടാവും. നിലയ്ക്കൽ റിയൽ ടൈം ബുക്കിംഗ് കേന്ദ്രം വഴി പ്രതിദിനം 10000 ഭക്തർക്ക് പ്രവേശനം നൽകും. എരുമേലിയിലെയും വണ്ടിപ്പെരിയാർ സത്രത്തിലെയും റിയൽ ടൈം ബുക്കിംഗ് കേന്ദ്രങ്ങൾ വഴി പ്രതിദിനം 2000 വീതം ഭക്തർക്ക് പ്രവേശനം നൽകും. ബഹുമാനപ്പെട്ട കേരള ഹൈക്കോടതി ഉത്തരവനുസരിച്ചാണ് പമ്പയിലെ റിയൽ ടൈം സ്പോട്ട് ബുക്കിംഗ് കേന്ദ്രം ഒഴിവാക്കിയത്. വെർച്ചൽ ക്യൂ ബുക്കിംഗ് തീർത്തും സൗജന്യമാണ്. ഭക്തർക്ക് താല്പര്യമനുസരിച്ച് അഞ്ചു രൂപ മുതൽ പിൽഗ്രിം റിലീഫ് ഫണ്ടിലേക്കും, ശുചിത്വ പരിപാലനത്തിനായി ജനറൽ ഫണ്ടിലേക്കും സംഭാവന നൽകുന്നതിനുള്ള സംവിധാനം ഒരുക്കിയിട്ടുണ്ട്. ഇത് നിർബന്ധമല്ല” എന്ന് പബ്ലിക്ക് റിലേഷൻസ് ഓഫീസർ ജി.എസ്. അരുൺ അറിയിച്ചു.
അയ്യപ്പഭക്തരുടെ വ്രതശുദ്ധിയും ആചാരമര്യാദകളും കാത്തുസൂക്ഷിച്ചുകൊണ്ട് തീർത്ഥാടന കാലം കുറ്റമറ്റ രീതിയിൽ പൂർത്തിയാക്കാൻ ഭരണകൂടവും ദേവസ്വം ബോർഡും പ്രതിജ്ഞാബദ്ധമായി പ്രവർത്തിക്കണമെന്ന ആവശ്യവും ശക്തമാണ്. ഇതര സംസ്ഥാനങ്ങളിൽ നിന്നടക്കം ഒഴുകിയെത്തുന്ന ലക്ഷക്കണക്കിന് ഭക്തർക്ക് പ്രാഥമിക സൗകര്യങ്ങളും സുരക്ഷയും ഒരുക്കുന്നതിൽ മുൻകാലങ്ങളിലുണ്ടായ വീഴ്ചകൾ ആവർത്തിക്കരുത്.
