കൊച്ചി: മണ്ഡലകാലത്ത് 41 ദിവസവും വ്രതമനുഷ്ഠിച്ച് അയ്യപ്പ ആരാധന നടത്താന് കേരളത്തിലെ വിശ്വാസികളോട് കേരള ക്ഷേത്ര സംരക്ഷണ സമിതി പ്രവര്ത്തക സമ്മേളനം ആഹ്വാനം ചെയ്തു. രണ്ടു ദിവസത്തെ സംസ്ഥാന സമ്മേളനത്തിന് എളമക്കര ഭാസ്കരീയത്തില് തുടക്കമായി. കേന്ദ്രമന്ത്രി പ്രതാപ്ചന്ദ്ര സാരംഗി സമ്മേളനം ഉദ്ഘാടനം ചെയ്തു.
ശബരിമലയ്ക്ക് കെട്ടുനിറച്ചു പോകുന്നവര് മാത്രമല്ല, ആബാലവൃദ്ധം വിശ്വാസികളും വ്രതംനോറ്റ് അയ്യപ്പധര്മവും വിശ്വാസവും അനുഷ്ഠിക്കണം, പാലിക്കണം. പ്രമേയം തുടര്ന്നു. സംസ്ഥാന വൈസ് പ്രസിഡന്റ് പ്രൊഫ. പി.എം. ഗോപി അവതരിപ്പിച്ചു. സി.കെ. കുഞ്ഞ് പിന്താങ്ങി. പ്രതിനിധി സമ്മേളനം സമിതി രക്ഷാധികാരി ആചാര്യ എ.കെ.ബി. നായര് ഉദ്ഘാടനം ചെയ്തു. സംസ്ഥാന അധ്യക്ഷന് പ്രൊഫ. കൃഷ്ണവര്മ രാജ, ഡോ. കരുമാത്ര വിജയന് തന്ത്രി, വര്ക്കിങ് പ്രസിഡന്റ് കെ.എസ്. നാരായണന്, രക്ഷാധികാരി കദംബന് നമ്പൂതിരിപ്പാട്, ജനറല് സെക്രട്ടറി കെ. നാരായണന്കുട്ടി, സംഘടനാ സെക്രട്ടറി ടി.യു. മോഹന്, സംസ്ഥാന സെക്രട്ടറി എ.പി. ഭരത്കുമാര്, ഉണ്ണിക്കൃഷ്ണന് കോലേഴി സംസാരിച്ചു.
സംഘടനാ ദൃഢീകരണം, ഭാവി പരിപാടികള്, ഹൈന്ദവര് നേരിടുന്ന വെല്ലുവിളികള് എന്നീ വിഷയങ്ങളില് ചര്ച്ച നടന്നു. പ്രതിനിധി സമ്മേളന സമാപനത്തില് ആര്എസ്എസ് പ്രാന്ത കാര്യവാഹ് പി. ഗോപാലന്കുട്ടി മാസ്റ്റര് സംസാരിച്ചു. നാലായിരത്തിലേറെ സമിതി ഘടകങ്ങളാണ് സംസ്ഥാനത്ത് പ്രവര്ത്തിക്കുന്നത്. 3182 എണ്ണം രജിസ്റ്റര് ചെയ്തവയാണ്. സമിതി നേരിട്ട് നടത്തുന്ന 517 ക്ഷേത്രങ്ങളുണ്ട്. സമ്മേളനത്തില് കൊളത്തൂര് അദൈ്വതാശ്രമം മഠാധിപതി സ്വാമി ചിദാനന്ദപുരി, ആര്എസ്എസ് അഖിലഭാരതീയ കാര്യകാരി സദസ്യന് എസ്. സേതുമാധവന്, പ്രാന്തീയ ബൗദ്ധിക് പ്രമുഖ് കെ.പി. രാധാകൃഷ്ണന്, എസ്.ജെ.ആര്. കുമാര് എന്നിവര് സംസാരിച്ചു.
