ജോധ്പൂര്‍ : ഭാരതത്തിന്റെ ഏറ്റവും വലിയ വ്യോമാഭ്യാസമായ ‘തരംഗ് ശക്തി’യുടെ ഭാഗമായി തദ്ദേശീയ പ്രതിരോധ നിര്‍മ്മാണ കരുത്ത് ലോകരാഷ്ട്രങ്ങള്‍ക്ക് മുന്നില്‍ അവതരിപ്പിക്കാന്‍ ഇന്ത്യ ഒരുങ്ങുന്നു. ജോധ്പൂരില്‍ സെപ്റ്റംബര്‍ 26 മുതല്‍ ഒക്ടോബര്‍ 12 വരെ നടക്കുന്ന ഈ അഭ്യാസപ്രകടനത്തോടനുബന്ധിച്ച് 40-ലധികം രാജ്യങ്ങളില്‍ നിന്നുള്ള വ്യോമസേനാ മേധാവികളാണ് ഇന്ത്യയിലെത്തുന്നത്. പ്രതിരോധ കയറ്റുമതി പുതിയ ഉയരങ്ങളിലെത്തിക്കുകയാണ് ലക്ഷ്യം.
സെപ്റ്റംബര്‍ 29-ന് ബെംഗളൂരുവിലെ എച്ച്.എ.എല്‍ (HAL), ബി.ഇ.എല്‍ (BEL) സ്ഥാപനങ്ങളും, ഒക്ടോബര്‍ 3-ന് വടോദരയിലെ സി295 (C295) വിമാന നിര്‍മ്മാണ ശാലയും വിദേശ പ്രതിനിധികള്‍ സന്ദര്‍ശിക്കും. ആകെ 65 രാജ്യങ്ങള്‍ക്ക് ക്ഷണം അയച്ചതില്‍, 8 രാജ്യങ്ങള്‍ വിമാനങ്ങളുമായും 32 രാജ്യങ്ങള്‍ നിരീക്ഷകരായും പങ്കെടുക്കുന്നു. യു.എസ്, ഫ്രാന്‍സ്, ജര്‍മ്മനി, യു.എ.ഇ, ഓസ്‌ട്രേലിയ, ബംഗ്ലാദേശ്, ശ്രീലങ്ക തുടങ്ങിയ രാജ്യങ്ങള്‍ വിമാനങ്ങളുമായി ജോധ്പൂരിലെത്തും.
2029-30 ഓടെ 50,000 കോടി രൂപയുടെ പ്രതിരോധ കയറ്റുമതിയാണ് ഇന്ത്യ ലക്ഷ്യമിടുന്നത്. 2025-26 കാലയളവില്‍ ഇന്ത്യയുടെ പ്രതിരോധ കയറ്റുമതി റെക്കോര്‍ഡ് തുകയായ 38,424 കോടി രൂപയിലെത്തിയിരുന്നു. റഷ്യയുമായി ചേര്‍ന്ന് ഇന്ത്യ വികസിപ്പിച്ചെടുത്ത ബ്രഹ്മോസ് ക്രൂയിസ് മിസൈലുകളും അസ്ത്ര മിസൈലുകളും ഇന്തോനേഷ്യയിലേക്ക് വിതരണം ചെയ്യാനുള്ള കരാറുകള്‍ ഇന്ത്യയുടെ കയറ്റുമതിക്ക് പുതിയ ഊര്‍ജ്ജം പകര്‍ന്നിട്ടുണ്ട്. ഫിലിപ്പൈന്റസിനും വിയറ്റ്നാമിനും ശേഷം ബ്രഹ്മോസ് സ്വന്തമാക്കുന്ന മൂന്നാമത്തെ ആസിയാന്‍ അംഗരാജ്യമാണ് ഇന്തോനേഷ്യ.
‘ഇന്ത്യ ഇപ്പോള്‍ ലോകത്തുനിന്ന് വാങ്ങുന്നതിനെക്കുറിച്ചല്ല ചിന്തിക്കുന്നത്, മറിച്ച് മറ്റുള്ളവര്‍ക്ക് വികസിപ്പിച്ചും നിര്‍മ്മിച്ചും നല്‍കുന്നതിനെക്കുറിച്ചാണ്,’ – എന്ന് ഐ.എ.എഫ് വൈസ് ചീഫ് എയര്‍ മാര്‍ഷ്മാന്‍ അശുതോഷ് ദീക്ഷിത് വ്യക്തമാക്കി. കയറ്റുമതി എളുപ്പമാക്കുന്നതിനായി ‘ഓപ്പണ്‍ ജനറല്‍ എക്സ്പോര്‍ട്ട് ലൈസന്‍സ്’ (OGEL) ചട്ടക്കൂട് ഉള്‍പ്പെടെയുള്ള നയപരമായ നിരവധി പരിഷ്‌കരണങ്ങളും സര്‍ക്കാര്‍ നടപ്പിലാക്കിയിട്ടുണ്ട്.
