ദില്ലി: മുല്ലപ്പെരിയാർ അണക്കെട്ടിന്റെ സമഗ്ര സുരക്ഷാ വിലയിരുത്തലിനായി ദേശീയ ഡാം സുരക്ഷാ അതോറിറ്റി രൂപീകരിച്ച സ്വതന്ത്ര വിദഗ്ധ സമിതിയിൽ നിന്ന് കേരളത്തിന്റെ പ്രതിനിധിയെ നീക്കി. സമിതിയിലെ കേരള പ്രതിനിധിയായിരുന്ന മുൻ സി.ഡബ്ല്യു.സി ചീഫ് എഞ്ചിനീയർ ടി.കെ. ശിവരാജനെയാണ് ഒഴിവാക്കിയത്വ്യക്തിപരമായ കാരണങ്ങളാൽ ശിവരാജനെ ലഭ്യമാകുന്നില്ല എന്നതിനാലാണ് നടപടിയെന്ന് കേന്ദ്രം പുറത്തിറക്കിയ ഉത്തരവിൽ വ്യക്തമാക്കുന്നു. ശിവരാജന് പകരം ഉത്തർപ്രദേശ് സ്വദേശിയായ പ്രൊഫ. എം.എൽ. ശർമ്മയെ സമിതിയിൽ ഉൾപ്പെടുത്തിയിട്ടുണ്ട്.
ഐ.ഐ.ടി റൂർക്കിയിലെ ഭൂകമ്പ എഞ്ചിനീയറിംഗ് വിഭാഗം പ്രൊഫസറും ഇന്റർനാഷണൽ സെന്റർ ഓഫ് എക്സലൻസ് ഫോർ ഡാംസ് മേധാവിയുമാണ് പുതുതായി നിയമിതനായ പ്രൊഫ. എം.എൽ. ശർമ്മ. ഭൂകമ്പ സാധ്യതകളെക്കുറിച്ചുള്ള പഠനങ്ങളിൽ വിദഗ്ധനായ അദ്ദേഹത്തിന്റെ നിയമനം അണക്കെട്ടിന്റെ ഘടനാപരമായ സുരക്ഷാ പരിശോധനകളിൽ നിർണ്ണായകമാകും. 2021-ലെ ഡാം സുരക്ഷാ നിയമപ്രകാരം ഈ വർഷം ജനുവരി 6-നാണ് മുല്ലപ്പെരിയാർ അണക്കെട്ടിന്റെ വിശദമായ പരിശോധനകൾക്കായി ദേശീയ ഡാം സുരക്ഷാ അതോറിറ്റി ഈ അഞ്ചംഗ സ്വതന്ത്ര വിദഗ്ധ സമിതിക്ക് രൂപം നൽകിയത്.
ബൽരാജ് ജോഷി ചെയർമാനായ സമിതിയിൽ ഗോപാൽ ധവാൻ, ഗുൽഷൻ രാജ്, എൻ. ശിവകുമാർ എന്നിവരാണ് മറ്റ് അംഗങ്ങൾ. സമിതിയിലെ അംഗങ്ങളുടെ മാറ്റം ഒഴികെ, ജനുവരി 6-ന് പുറപ്പെടുവിച്ച ആദ്യ ഉത്തരവിലെ മറ്റ് നിബന്ധനകളിലോ വ്യവസ്ഥകളിലോ യാതൊരുവിധ മാറ്റവുമില്ലെന്ന് അതോറിറ്റി ഔദ്യോഗികമായി അറിയിച്ചിട്ടുണ്ട്. വിദഗ്ധ സമിതി പുനഃസംഘടിപ്പിച്ചുകൊണ്ടുള്ള പുതിയ ഉത്തരവിന്റെ പകർപ്പുകൾ കേന്ദ്രം കേരള അഡീഷണൽ ചീഫ് സെക്രട്ടറിക്കും തമിഴ്നാട് ജലവിഭവ വകുപ്പ് സെക്രട്ടറിക്കും ഔദ്യോഗികമായി കൈമാറിയിട്ടുണ്ട്. കേരളത്തിന്റെ ആശങ്കകൾ ശക്തമായി നിലനിൽക്കുന്ന സാഹചര്യത്തിൽ ഈ സമിതിയുടെ കണ്ടെത്തലുകൾ വരുംദിവസങ്ങളിൽ ഏറെ നിർണ്ണായകമാകും.
