ഹൈദരാബാദ്: ആറു വയസ്സുള്ള തന്റെ മകളെ ഹൈദരാബാദിലെ ഹുസൈന്‍ സാഗര്‍ തടാകത്തിലേക്ക് വലിച്ചെറിഞ്ഞ് ഒരു അമ്മ. ഓട്ടോറിക്ഷ ഡ്രൈവര്‍, സ്വകാര്യ ജീവനക്കാരന്‍, ഒരു ബിസിനസമാന്‍ എന്നീ മൂന്ന് വ്യക്തികള്‍ സ്വന്തം ജീവന്‍ പണയപ്പെടുത്തി കുട്ടിയെ ഉടന്‍ തന്നെ രക്ഷപ്പെടുത്തി. എട്ട്, ആറ് വയസ്സുള്ള രണ്ട് പെണ്‍മക്കളുള്ള ബോവന്‍പല്ലി സ്വദേശിനിയായ ഒരു സ്ത്രീ, ഇളയ മകളെ തടാകത്തിലേക്ക് തള്ളിയിട്ട് രക്ഷപ്പെടുകയായിരുന്നു.
ഹൈദരാബാദിലെ അപ്പര്‍ ടാങ്ക് ബണ്ടിലാണ് സംഭവം നടന്നത്. കുട്ടിയുടെ ദീര്‍ഘകാലമായുള്ള അസുഖവും പെരുകിവരുന്ന ചികിത്സാ ചെലവുകളുമാണ് ഈ കടുംകൈ ചെയ്യാന്‍ സ്ത്രീയെ പ്രേരിപ്പിച്ചത് എന്ന് കരുതപ്പെടുന്നു. സ്ത്രീ തന്റെ രണ്ട് കുട്ടികളേയും കൂട്ടി ടാങ്ക് ബണ്ടില്‍ എത്തുകയും, ഐസ്‌ക്രീം വാങ്ങാനായി മൂത്ത മകളെ ദൂരേക്കയക്കുകയും ചെയ്തു. തുടര്‍ന്ന് ആരും കാണാത്ത സമയത്ത് ഇളയ പെണ്‍കുട്ടിയെ തടാകത്തിലേക്ക് തള്ളിയിടുകയായിരുന്നു. വെള്ളത്തിലുണ്ടായിരുന്ന ഒരു മുളങ്കമ്പില്‍ പിടിച്ച് രക്ഷപ്പെടാന്‍ ശ്രമിച്ച കുട്ടി, തന്റെ അമ്മയാണ് തന്നെ തടാകത്തിലേക്ക് തള്ളിയിട്ടെന്ന് പറഞ്ഞ് ഉറക്കെ കരഞ്ഞു.
ബോറബന്ദ മൊതി നഗര്‍ സ്വദേശിയായ ബാലകൃഷ്ണ കുട്ടിയുടെ നിലവിളി കേട്ട് വഴിപോക്കരെ വിവരമറിയിച്ചു. അപ്പര്‍ ടാങ്ക് ബണ്ടിലൂടെ ഓട്ടോ ഓടിക്കുകയായിരുന്ന ഫഖറുദ്ദീന്‍ ഓട്ടോ നിര്‍ത്തി വെള്ളത്തിലേക്ക് ചാടി. അഫ്‌സറിന്റെ സഹായത്തോടെ അദ്ദേഹം കുട്ടിയെ സുരക്ഷിതമായി കരയിലെത്തിച്ചു. പട്രോളിംഗ് നടത്തിയ പൊലീസ് ഉദ്യോഗസ്ഥര്‍ കുട്ടിയെ ചികിത്സയ്ക്കായി ഗാന്ധി ആശുപത്രിയിലേക്ക് മാറ്റി. ഡോമാല്‍ഗുഡ പൊലീസ് അമ്മയ്ക്കെതിരെ കൊലപാതകശ്രമത്തിന് കേസെടുത്ത് അന്വേഷണം ആരംഭിച്ചു. മൂന്ന് നല്ല മനുഷ്യരുടെ പെട്ടെന്നുള്ള രക്ഷാപ്രവര്‍ത്തനത്തെ പ്രശംസിച്ച ഹൈദരാബാദ് പൊലീസ് മേധാവി സജ്ജനാര്‍, അവരുടെ പ്രവൃത്തികള്‍ മനുഷ്യത്വത്തിന്റെയും സാമൂഹിക ഉത്തരവാദിത്തത്തിന്റെയും മികച്ച മാതൃകയാണെന്ന് പറഞ്ഞു.
‘പ്രയാസമനുഭവിക്കുന്നവരെ സഹായിക്കുന്നതിന് പകരം ചിലപ്പോള്‍ മൊബൈല്‍ ഫോണില്‍ വീഡിയോകള്‍ എടുക്കാന്‍ മാത്രം ആളുകള്‍ തിരക്കുകൂട്ടുന്ന ഇക്കാലത്ത്, ഈ മൂന്ന് പൗരന്മാര്‍ കാണിച്ച ധൈര്യവും സമയോചിതമായ ഇടപെടലും മാതൃകാപരമാണ്,’ അദ്ദേഹം പറഞ്ഞു. കടുത്ത വ്യക്തിപരമോ സാമ്പത്തികമോ ആയ ബുദ്ധിമുട്ടുകള്‍ നേരിടുന്ന ആളുകള്‍ ഇത്തരം കടുംകൈകള്‍ ചെയ്യുന്നതിന് പകരം സഹായം തേടണമെന്നും സജ്ജനാര്‍ അഭ്യര്‍ത്ഥിച്ചു.
ബഷീര്‍ബാഗിലെ പൊലീസ് കമ്മീഷണറേറ്റില്‍ നടന്ന ചടങ്ങില്‍ ഓട്ടോറിക്ഷ ഡ്രൈവര്‍ ഫഖറുദ്ദീന്‍, സ്വകാര്യ ജീവനക്കാരന്‍ കെ. ബാലകൃഷ്ണ, ബിസിനസുകാരന്‍ മുഹമ്മദ് അഫ്‌സര്‍ എന്നിവരെ കുട്ടിയുടെ ജീവന്‍ രക്ഷിച്ചതിന് ഷാളുകള്‍ അണിയിച്ചും ക്യാഷ് അവാര്‍ഡുകള്‍ നല്‍കിയും ആദരിച്ചു.
