അഹമ്മദാബാദ് : രാജ്യത്തെ നടുക്കിയ 2008-ലെ അഹ്മദാബാദ് സ്ഫോടന പരമ്പരക്കേസിൽ 38 പ്രതികൾക്ക് വിചാരണക്കോടതി വിധിച്ച വധശിക്ഷ ശരിവെച്ച് ഗുജറാത്ത് ഹൈക്കോടതി. കേസിൽ കുറ്റക്കാരാണെന്ന് കണ്ടെത്തിയ മറ്റ് 11 പ്രതികളുടെ ജീവപര്യന്തം തടവുശിക്ഷയും കോടതി നിലനിർത്തിയിട്ടുണ്ട്. കീഴ്കോടതി വിധി ചോദ്യം ചെയ്തുകൊണ്ട് പ്രതികൾ സമർപ്പിച്ച ഹർജികൾ തള്ളിക്കൊണ്ടാണ് ജസ്റ്റിസുമാരായ എ.വൈ. കോഗ്ജെ, സമീർ ദാവെ എന്നിവരടങ്ങുന്ന ഡിവിഷൻ ബെഞ്ച് ഈ നിർണായക വിധി പ്രസ്താവിച്ചത്. ഇന്ത്യയിലെ ഒരു കോടതി ഒരേസമയം ഇത്രയധികം പ്രതികൾക്ക് വധശിക്ഷ ഉറപ്പാക്കുന്ന അപൂർവ കേസുകളിൽ ഒന്നാണിത്.
വധശിക്ഷയ്ക്ക് വിധിക്കപ്പെട്ടവരിൽ കോട്ടയം ഈരാറ്റുപേട്ട സ്വദേശികളായ ഷിബിലി എ. കരീം, ശാദൂലി എ. കരീം, മലപ്പുറം സ്വദേശി ശറഫുദ്ദീൻ എന്നീ മൂന്ന് മലയാളികളും ഉൾപ്പെടുന്നു. സിമി മുൻ അഖിലേന്ത്യ ജനറൽ സെക്രട്ടറി സഫ്ദർ നാഗോറി, ഖമറുദ്ദീൻ നാഗോറി, ഖയൂമുദ്ദീൻ കപാഡിയ, സാഹിദ് ശൈഖ്, ഷംസുദ്ദീൻ ശൈഖ് തുടങ്ങിയ പ്രധാന ഗൂഢാലോചകരും ശിക്ഷിക്കപ്പെട്ടവരിൽ പെടുന്നു. സ്ഫോടനങ്ങൾക്ക് പിന്നിൽ നിരോധിത സംഘടനയായ സിമിയിലെ അംഗങ്ങൾ രൂപീകരിച്ച ഇന്ത്യൻ മുജാഹിദീൻ ആണെന്നായിരുന്നു പൊലീസിന്റെ കണ്ടെത്തൽ. വിവിധ സംസ്ഥാനങ്ങളിൽ നിന്നുള്ള 78 പ്രതികൾ വിചാരണ നേരിട്ട കേസിൽ 49 പേരെ കുറ്റക്കാരായി കണ്ടെത്തുകയും 28 പേരെ കോടതി വെറുതെ വിടുകയുമായിരുന്നു.
ശിക്ഷാവിധി ശരിവെച്ചതിനൊപ്പം ഇരകൾക്കുള്ള നഷ്ടപരിഹാര തുക വലിയ തോതിൽ വർദ്ധിപ്പിക്കാനും ഹൈകോടതി ഉത്തരവിട്ടു. സ്ഫോടനത്തിൽ ജീവൻ നഷ്ടപ്പെട്ടവരുടെ കുടുംബാംഗങ്ങൾക്ക് 10 ലക്ഷം രൂപ വീതവും, ഗുരുതരമായി പരിക്കേറ്റവർക്ക് അഞ്ച് ലക്ഷം രൂപ വീതവും സംസ്ഥാന സർക്കാർ നഷ്ടപരിഹാരം നൽകണം. ഈ തുക 2027 മാർച്ച് 30നകം വിതരണം ചെയ്യണമെന്നാണ് നിർദേശം. മുൻപ് വിചാരണക്കോടതി ഇത് യഥാക്രമം ഒരു ലക്ഷം രൂപയും 50,000 രൂപയുമായാണ് നിശ്ചയിച്ചിരുന്നത്. 2008 ജൂലൈ 26ന് വെറും 70 മിനിറ്റിനിടെയുണ്ടായ 21 സ്ഫോടനങ്ങളിൽ 56 പേർ കൊല്ലപ്പെടുകയും ഇരുന്നൂറിലധികം ആളുകൾക്ക് പരിക്കേൽക്കുകയും ചെയ്തിരുന്നു.
