ദില്ലി: ഇന്ത്യ തദ്ദേശീയമായി വികസിപ്പിച്ച മധ്യദൂര മിസൈലായ ആകാശ് വിജയകരമായി പരീക്ഷിച്ചു. ദേശീയ പ്രതിരോധ ഗവേഷണ വിഭാഗം (ഡി ആർ ഡി ഒ) നിർമ്മിച്ച ആകാശ് മിസൈൽ കരയിൽ നിന്ന് ഏത് കാലാവസ്ഥയിലും പ്രയോഗിക്കാൻ സാധിക്കും. കഴിഞ്ഞ രണ്ടു ദിവസത്തിനുള്ളിൽ രണ്ടാമത്തെ വിജയകരമായ പരീക്ഷണമായിരുന്നു ഇത്.
എല്ലാ കാലാവസ്ഥക്കും ഉതകുന്ന മൾട്ടി ഡയറക്ഷണൽ സിസ്റ്റമാണ് ആകാശ് മിസൈലിനുള്ളത്. ഇൻഡിജീനിയസ് റേഡിയോ ഫ്രീക്വൻസി സീക്കർ എന്ന പുതിയ സംവിധാനവും പരിഷ്കരിച്ച ആകാശ് മിസൈലിൽ ഉൾപ്പെടുത്തി. 75 കിലോയോളം ഭാരം വഹിക്കാൻ ആകാശിന് ശേഷിയുണ്ട്. 5.8 മീറ്റർ നീളമുള്ള ആകാശിന് 2.5 മാക് (ശബ്ദത്തിന്റെ ഇരട്ടി വേഗം) വേഗത്തിൽ കുതിക്കാനാകും.
