തിരുവനന്തപുരം : പിഎസ്സി പരീക്ഷാ മൂല്യനിർണയത്തിലുണ്ടായ വൻ ക്രമക്കേടിൽ അന്വേഷണം. ആസൂത്രണ ബോർഡിലെ ഉന്നത പരീക്ഷയിലാണ് അട്ടിമറി നടന്നെന്ന പരാതി ഇന്ന് ചേരുന്ന പിഎസ്സി യോഗം ചർച്ച ചെയ്യും. ഈ യോഗത്തിൽ അന്വേഷണം പ്രഖ്യാപിക്കുമെന്നാണ് വിവരം. നിയമനം ലഭിച്ച ഉദ്യോഗാര്ഥിക്ക് നോട്ടീസ് അയക്കാനും പിഎസ്സി ആലോചിക്കുന്നുണ്ട്.
സംസ്ഥാന സർക്കാരിന് നേരിട്ട് ഉപദേശങ്ങൾ നൽകുന്ന സുപ്രധാന സമിതിയിലെ ഉന്നത തസ്തികകളിലേക്ക് നടന്ന പരീക്ഷയിലെ അട്ടിമറി ആരോപണം ഇന്ന് ചേരുന്ന പിഎസ്സി യോഗം അടിയന്തരമായി ചർച്ച ചെയ്യും. സംഭവത്തിൽ പിഎസ്സി ഔദ്യോഗിക അന്വേഷണം പ്രഖ്യാപിക്കുമെന്നാണ് വിവരം. ഇതോടൊപ്പം ക്രമക്കേടിലൂടെ ഇതിനകം നിയമന ശുപാർശ ലഭിച്ച ഉദ്യോഗാർത്ഥിക്ക് നോട്ടീസ് അയക്കാനും കമ്മീഷൻ ആലോചിക്കുന്നുണ്ട്.
പരീക്ഷ എഴുതിയ ഭൂരിഭാഗം ഉദ്യോഗാർത്ഥികളുടെയും പത്തോളം ചോദ്യങ്ങളുടെ ഉത്തരങ്ങൾ മൂല്യനിർണയം നടത്താതെയാണ് റാങ്ക് പട്ടിക തയ്യാറാക്കിയതെന്ന ഞെട്ടിക്കുന്ന വിവരമാണ് പുറത്തുവന്നത്. വിട്ടുപോയ ഈ 10 ചോദ്യങ്ങൾ വീണ്ടും മൂല്യനിർണയം നടത്തി തെറ്റ് തിരുത്താനാണ് പിഎസ്സി ഇപ്പോൾ ഒരുങ്ങുന്നത്. പദവിയിലേക്ക് റാങ്ക് പട്ടിക പ്രസിദ്ധീകരിച്ച് വെറും മൂന്നാഴ്ചയ്ക്കുള്ളിൽ പിഎസ്സി അസാധാരണ വേഗത്തിൽ നിയമന ശുപാർശ നൽകിയതും വലിയ സംശയങ്ങൾക്ക് വഴിവെച്ചിട്ടുണ്ട്.
ആസൂത്രണ ബോർഡിലെ ഇൻഡസ്ട്രി ആൻഡ് ഇൻഫ്രാ ചീഫ്, പ്ലാൻ കോഡിനേഷൻ ഡിവിഷൻ ചീഫ്, പെസ്‌പെക്റ്റീവ് പ്ലാനിങ് ചീഫ് എന്നീ മൂന്ന് ഉന്നത തസ്തികകളിലേക്കുമായി ഒരൊറ്റ പരീക്ഷയാണ് പിഎസ്സി നടത്തിയിരുന്നത്. പരീക്ഷാ മൂല്യനിർണയത്തിൽ വന്ന പിഴവ് ബോധ്യപ്പെട്ടതോടെ ഈ മൂന്ന് നിയമനങ്ങളെയും പുതിയ വിവാദം ദോഷകരമായി ബാധിക്കും. നിലവിൽ പ്രസിദ്ധീകരിച്ച റാങ്ക് പട്ടിക പൂർണ്ണമായി മാറ്റേണ്ടി വരുമെന്നാണ് സൂചന. ഇതിൽ രണ്ട് പോസ്റ്റുകളിലേക്കുള്ള നിയമന നടപടികൾ സർക്കാർ ഇതിനകം തന്നെ പൂർത്തിയാക്കിയിട്ടുണ്ട്.
അതേസമയം, മൂല്യനിർണയത്തിലെ ഗുരുതരമായ ഈ ക്രമക്കേടിൽ കേരള അഡ്മിനിസ്ട്രേറ്റീവ് ട്രിബ്യൂണൽ (കെഎടി) അടിയന്തരമായി ഇടപെട്ടു. ആസൂത്രണ ബോർഡിലേക്ക് നിലവിൽ നടത്തിയിട്ടുള്ള ഉന്നത നിയമനങ്ങൾ അന്തിമമല്ലെന്നും, അവ കോടതിയുടെ വരാനിരിക്കുന്ന അന്തിമ വിധിക്ക് വിധേയമായിരിക്കുമെന്നും ട്രിബ്യൂണൽ വ്യക്തമാക്കി. ഇതോടെ റാങ്ക് പട്ടികയിൽ പിഎസ്സി വരുത്തുന്ന തിരുത്തലുകളും കോടതിയുടെ നിലപാടും ഈ ഉന്നത തസ്തികകളുടെ ഭാവി നിർണ്ണയിക്കുന്നതിൽ നിർണ്ണായകമാകും.
