നവംബർ ഒന്ന്. മലയാളികളുടെ അഭിമാനത്തിന്റെയും ഒരുമയുടെയും ഓർമ പുതുക്കുന്ന കേരളപ്പിറവി ദിനം. മലയാളം സംസാരിക്കുന്ന പ്രദേശങ്ങളെ ഏകോപിപ്പിച്ച് 1956 നവംബർ ഒന്നിനാണ് ഐക്യകേരളം രൂപംകൊണ്ടത്. ഭാഷാപരമായ സ്വത്വത്തിന്റെയും സാംസ്കാരിക പൈതൃകത്തിന്റെയും കൂട്ടായ്മയുടെയും ഓർമകൾ പുതുക്കുന്ന ദിനമാണിത്. കേരളപ്പിറവി ദിനത്തിൽ സംസ്ഥാനത്തെ ജനങ്ങൾക്ക് ആശംസകൾ നേർന്ന് ഗവർണർ ഓംപ്രകാശ് മാഥൂർ . കഴിഞ്ഞ ഏഴ് പതിറ്റാണ്ടിനിടെ കേരളം സ്വന്തമാക്കിയ സവിശേഷമായ വ്യക്തിത്വവും ഭാഷയും കലയും സംസ്കാരവും പ്രകൃതിഭംഗിയും സൗഹാർദ പാരമ്പര്യവും അദ്ദേഹം സന്ദേശത്തിൽ എടുത്തുപറഞ്ഞു.
വിദ്യാഭ്യാസം, ആരോഗ്യം, സാക്ഷരത തുടങ്ങിയ മേഖലകളിൽ കേരളം കൈവരിച്ച നേട്ടങ്ങൾ രാജ്യത്തിന് തന്നെ പ്രചോദനമാണെന്ന് ഗവർണർ ചൂണ്ടിക്കാട്ടി. ശ്രീനാരായണ ഗുരു, അയ്യങ്കാളി, ചട്ടമ്പി സ്വാമികൾ തുടങ്ങിയ സാമൂഹിക പരിഷ്കർത്താക്കളുടെ സംഭാവനകളെയും അദ്ദേഹം അനുസ്മരിച്ചു. സമത്വത്തിന്റെയും മാനവികതയുടെയും ആശയങ്ങൾ ഇന്നും കേരളത്തിന് വഴികാട്ടിയാണെന്നും സന്ദേശത്തിൽ വ്യക്തമാക്കി. ലോകത്തിന്റെ വിവിധ ഭാഗങ്ങളിൽ കഴിയുന്ന മലയാളികളുടെ സംഭാവനകളെയും ഗവർണർ പ്രത്യേകം അഭിനന്ദിച്ചു.
ഐക്യവും സൗഹാർദവും വികസനവും കൂടുതൽ ശക്തിപ്പെടുത്തുന്നതിനായി എല്ലാവരും ഒരുമിച്ച് പ്രവർത്തിക്കണമെന്ന് ഓർമിപ്പിച്ച ഗവർണർ, കേരളത്തിന്റെ പുരോഗതിയിൽ ഓരോരുത്തർക്കുമുള്ള പങ്കും എടുത്തുപറഞ്ഞു. ചരിത്രപരമായ നേട്ടങ്ങളിൽ അഭിമാനിക്കുന്നതിനൊപ്പം ഭാവിയിലെ വെല്ലുവിളികൾ ഏറ്റെടുക്കാനും കേരളത്തിന് കഴിയണം. ഭാഷയുടെയും സംസ്കാരത്തിന്റെയും തനിമ കാത്തുസൂക്ഷിച്ച് വികസനത്തിന്റെ പുതിയ ഉയരങ്ങളിലേക്ക് മുന്നേറാൻ സംസ്ഥാനത്തിന് കഴിയട്ടെയെന്നും ഓംപ്രകാശ് മാഥൂർ ആശംസിച്ചു.
