തിരുവനന്തപുരം : വുഹാനില് നിന്നും തിരിച്ചെത്തിയ കാസര്ഗോഡ് ജില്ലയിലെ ഒരു വിദ്യാര്ത്ഥിക്ക് കൂടി കൊറോണ വൈറസ് ബാധ സ്ഥിരീകരിച്ചതായി ആരോഗ്യ വകുപ്പ് മന്ത്രി കെ കെ ശൈലജ ടീച്ചര് അറിയിച്ചു. കാഞ്ഞങ്ങാട് ജില്ലാ ആശുപത്രിയില് ചികിത്സയിലുള്ള വിദ്യാര്ത്ഥിയുടെ ആരോഗ്യനില നിലവില് തൃപ്തികരമാണ്. ആശുപത്രിയില് പ്രവേശിപ്പിക്കപ്പെട്ട ആരുടേയും ആരോഗ്യനിലയില് ആശങ്കയ്ക്ക് വകയില്ല. ഞായറാഴ്ച വരെ 104 സാമ്പിളുകള് പരിശോധന നടത്തിയതില് തൃശൂര്, ആലപ്പുഴ ജില്ലകളിലെ രണ്ട് വിദ്യാര്ത്ഥികള്ക്കാണ് രോഗബാധ സ്ഥിരീകരിച്ചിരുന്നത്. ഇതോടെ സംസ്ഥാനത്ത് മൂന്ന് പേര്ക്കാണ് കൊറോണ വൈറസ് സ്ഥിരീകരിച്ചതെന്നും മന്ത്രി വ്യക്തമാക്കി.
സംസ്ഥാനത്ത് കൊറോണ സ്ഥിരീകരിച്ച മൂന്നുപേരും സഹപാഠികളെന്നും തിരിച്ചറിഞ്ഞു. മൂന്നുപേരും ഒരുമിച്ചാണ് ചൈനയില് നിന്ന് മടങ്ങിയെത്തിയത്. തൃശൂര്, ആലപ്പുഴ, കാസര്കോട് എന്നിവിടങ്ങളിലാണ് സംസ്ഥാനത്ത് കൊറോണ സ്ഥിരീകരിച്ചത്
അതേസമയം, ചൈനയ്ക്ക് പുറത്ത് ആദ്യത്തെ കൊറോണ മരണം ഫിലിപ്പിന്സില് സ്ഥിരീകരിച്ചു. ഒരാളാണ് ഫിലിപ്പിന്സില് മരിച്ചത്. കൊറോണ ബാധ സംബന്ധിച്ച സ്ഥിതിഗതികള് ചര്ച്ച ചെയ്യാന് ജി 7 രാജ്യങ്ങള് ജര്മ്മനിയില് യോഗം ചേരും. ലോകരാജ്യങ്ങള് സ്വന്തം പൗരന്മാര്ക്ക് ചൈനയിലേക്ക് യാത്ര ചെയ്യുന്നതിന് ഏര്പ്പെടുത്തിയ നിയന്ത്രണം തുടരും.