കണ്ണൂര്‍: പരിയാരം കണ്ണൂർ ഗവ. മെഡിക്കൽ കോളേജിൽ ആംബുലന്‍സ് ഡ്രൈവര്‍ക്ക് കുത്തേറ്റു. പിലാത്തറ സ്വദേശി റിജേഷിനാണ് കുത്തേറ്റത്. ഉടനെ റിജേഷിനെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
ഇന്ന് വൈകുന്നേരം 3.30 ന് മെഡിക്കൽ കോളേജ് പരിസരത്തു വെച്ചാണ് സംഭവം. തർക്കത്തെ തുടർന്ന് മൂന്നു പേർ പയ്യന്നൂർ പ്രിയദർശിനി ആശുപത്രിയിലും ചികിത്സ തേടിയിട്ടുണ്ട്.
വാഹനം പാര്‍ക്ക് ചെയ്യുന്നതുമായി ബന്ധപ്പെട്ട തര്‍ക്കമാണ് അക്രമത്തില്‍ കലാശിച്ചത്. നേരത്തെയും മെഡിക്കൽ കോളേജിൽ ആംബുലൻസ് സർവീസുമായി ബന്ധപ്പെട്ട് ഡ്രൈവർമാർ തമ്മിൽ തർക്കമുണ്ടായിട്ടുണ്ട്. ഇതിൻ്റെ തുടർച്ചയാണ് ഇന്ന് നടന്ന സംഭവം. ബിയർ കുപ്പി കൊണ്ടാണ് റിജേഷിനു കുത്തേറ്റത്. മാത്രമല്ല തർക്കത്തിനിടെ മറ്റൊരു ആംബുലൻസ് ഡ്രൈവറാണ് കുത്തിയത്.
നേരത്തെ ആംബുലൻസുകൾക്ക് ക്യൂ സിസ്റ്റം നടപ്പിലാക്കിയിരുന്നു. അതിനിടെ റിജേഷിൻ്റെ ആംബുലൻസിന് ഫ്രീസർ സംവിധാനമില്ലെന്ന് കണ്ട് തർക്കമുണ്ടായി. പിന്നീട് ഇയാൾ തലശേരിയിൽ പോയി ഫ്രീസറുള്ള ആംബുലൻസ് എത്തിച്ച് സർവീസ് നടത്തി. ഇതേത്തുടർന്നാണ് പ്രകോപനത്തിനു കാരണമായതെന്നും സൂചനയുണ്ട്. സംഭവത്തിൽ പരിയാരം പോലീസ് അന്വേഷണം തുടങ്ങി. ആശുപത്രിയിലുള്ളവരുടെ മൊഴി ഉടൻ രേഖപ്പെടുത്തും.
