ഇടുക്കി:ചിന്നക്കനാലിൽ വീണ്ടും കാട്ടാന ആക്രമണം. 301 കോളനിയിലാണ് വീണ്ടും കാട്ടാനയുടെ ആക്രമണം ഉണ്ടായത്. ഇന്നലെ രാത്രിയോടെയാണ് സംഭവം.കോളനിയിലെ ഒരു വീട് ആനക്കൂട്ടം തകർത്തു.കോളനിയിലെ താമസക്കാരനായ ഐസക്കിന്റെ വീടാണ് തകർത്തത്.ആക്രമണം നടക്കുന്ന സമയത്ത് ഐസക്കും കുടുംബവും അടുത്ത വീട്ടിൽ ആയിരുന്നതിനാൽ പരിക്ക് ഏൽക്കാതെ രക്ഷപെട്ടു. അരിക്കൊമ്പൻ ഉൾപ്പെട്ട കാട്ടാന കൂട്ടമാണ് ആക്രമിച്ചതെന്നാണ് നാട്ടുകാർ പറയുന്നത്.
അതേസമയം ഇടുക്കി ചിന്നക്കനാൽ മേഖലയിൽ കാട്ടാനകളുടെ ആക്രമണം വർദ്ധിച്ച് വരികയാണ്.കഴിഞ്ഞ ദിവസം 301 കോളനിയിൽ അരിക്കൊമ്പൻ ഒരു വീട് തകർത്തിരുന്നു. വീടിന്റെ അടുക്കള ഭാഗവും ഷെഡുമാണ് ആന തകർത്തത്. 301 കോളനിയിലെ വി ജെ ജോർജ് എന്നയാളുടേതാണ് വീട്. അയൽവാസികളും വനപാലകരും ചേർന്ന് ആനയെ തുരത്തിയെങ്കിലും ഭീതി ഒഴിഞ്ഞിട്ടില്ല.