ക്വറ്റ : പാകിസ്ഥാനിലെ ബലൂചിസ്ഥാൻ പ്രവിശ്യയിലെ ക്വറ്റയിൽ ഉഗ്ര സ്ഫോടനം.സ്ഫോടനത്തിൽ 10 പേർ കൊല്ലപ്പെടുകയും 32 പേർക്ക് പരിക്കേൽക്കുകയും ചെയ്തു. ക്വറ്റയിലെ സർഗൂൺ റോഡിലുള്ള ഫ്രോണ്ടിയർ കോൺസ്റ്റബുലറി സൈനിക ആസ്ഥാനത്തിന് സമീപത്തായാണ് ബോംബ് പൊട്ടിത്തെറിച്ചത്.
മോഡൽ ടൗണിലും സമീപ പ്രദേശങ്ങളിലുടനീളം സ്ഫോടന ശബ്ദം കേൾക്കുകയും അടുത്തുള്ള വീടുകളുടെയും കെട്ടിടങ്ങളുടെയും ജനൽ ചില്ലുകൾ തകരുകയും ചെയ്തതായി പാക് മാദ്ധ്യമങ്ങൾ റിപ്പോർട്ട് ചെയ്തു.
സ്ഫോടനത്തിന് തൊട്ടുപിന്നാലെ പ്രദേശത്ത് വെടിവയ്പ്പും കേട്ടത് പ്രദേശവാസികൾക്കിടയിൽ പരിഭ്രാന്തി പരത്തി. സ്ഫോടകവസ്തുക്കൾ നിറച്ച ഒരു വാഹനം മോഡൽ ടൗണിൽ നിന്ന് ഹാലി റോഡിലേക്ക് തിരിയുന്നതിനിടെ FC ആസ്ഥാനത്തിന് സമീപം പൊട്ടിത്തെറിക്കുകയായിരുന്നു എന്ന് പോലീസ് വൃത്തങ്ങൾ വെളിപ്പെടുത്തി. തിരക്കേറിയ റോഡിൽ സ്ഫോടനം നടക്കുന്നതിന്റെ സിസിടിവി ദൃശ്യങ്ങൾ സമൂഹ മാദ്ധ്യമങ്ങളിൽ പ്രചരിക്കുകയാണ്
ആക്രമണത്തിൽ അഞ്ച് പേർ സംഭവസ്ഥലത്തും അഞ്ചുപേർ ചികിത്സയ്ക്കിടെയുമാണ് മരിച്ചതെന്ന് ബലൂചിസ്ഥാൻ ആരോഗ്യ മന്ത്രി ബഖ്ത് മുഹമ്മദ് കാക്കർ സ്ഥിരീകരിച്ചു. പരിക്കേറ്റ 32 പേരെ സിവിൽ ആശുപത്രിയിലും ട്രോമ സെന്ററുകളിലുമായി പ്രവേശിപ്പിച്ചു. പരിക്കേറ്റവരിൽ രണ്ട് എഫ്‌സി ഉദ്യോഗസ്ഥരും ഉൾപ്പെടുന്നു.
വൻതോതിലുള്ള ആളപായം ഭയന്ന് നഗരത്തിലെ ആശുപത്രികളിൽ അടിയന്തരാവസ്ഥ പ്രഖ്യാപിച്ചു. രക്ഷാപ്രവർത്തകരും പോലീസ് ഉദ്യോഗസ്ഥരും സംഭവസ്ഥലത്തെത്തി പ്രദേശം വളയുകയും തിരച്ചിൽ ആരംഭിക്കുകയും ചെയ്തതായി പാക് മാദ്ധ്യമങ്ങൾ റിപ്പോർട്ട് ചെയ്തു. സ്ഫോടനത്തിന്റെ സ്വഭാവം നിർണ്ണയിക്കാൻ അധികൃതർ അന്വേഷണം ആരംഭിച്ചിട്ടുണ്ട്.
