സംഗീത ലോകത്തെ അമ്പരപ്പിച്ചുകൊണ്ട് പിന്നണി ഗാനരംഗം ഉപേക്ഷിക്കുകയാണെന്ന് പ്രഖ്യാപിച്ച ഗായകൻ അരിജിത് സിങ് രാഷ്ട്രീയത്തിലേക്ക് ചുവടുവെക്കുന്നതായി സൂചന. ജനുവരി 27-ന് താൻ പിന്നണി ഗാനരംഗത്തുനിന്ന് വിരമിക്കുകയാണെന്ന അദ്ദേഹത്തിന്റെ സോഷ്യൽ മീഡിയ പോസ്റ്റ് ലക്ഷക്കണക്കിന് ആരാധകരെയാണ് നിരാശരാക്കിയത്. എന്നാൽ ഇതിന് പിന്നാലെ അദ്ദേഹം സ്വന്തമായി ഒരു രാഷ്ട്രീയ പാർട്ടി രൂപീകരിക്കാൻ ആലോചിക്കുന്നതായി ഒരു ദേശീയ മാദ്ധ്യമം പുറത്തുവിട്ട റിപ്പോർട്ടുകൾ വ്യക്തമാക്കുന്നു.
ബംഗാളി സിനിമാ മേഖലയിലെ അടുത്ത വൃത്തങ്ങളിൽ നിന്നുള്ള വിവരമനുസരിച്ച്, അരിജിത് സിങ് തന്റെ രാഷ്ട്രീയ പാർട്ടി ഉടൻ പ്രഖ്യാപിക്കില്ലെങ്കിലും അതിന്റെ പ്രാരംഭ പ്രവർത്തനങ്ങൾ ആരംഭിച്ചു കഴിഞ്ഞു. 2026-ലെ ബംഗാൾ നിയമസഭാ തെരഞ്ഞെടുപ്പിൽ അദ്ദേഹം നേരിട്ട് മത്സരിക്കാൻ സാധ്യതയില്ലെങ്കിലും, താഴെത്തട്ടിലുള്ള പ്രവർത്തനങ്ങളിലൂടെ ജനങ്ങളിലേക്ക് ഇറങ്ങിച്ചെല്ലാനാണ് അദ്ദേഹം ലക്ഷ്യമിടുന്നത്. കോടിക്കണക്കിന് രൂപ വരുമാനമുണ്ടായിട്ടും ജന്മനാടായ മുർഷിദാബാദിലെ ജിയാഗഞ്ചിൽ ലളിതമായ ജീവിതം നയിക്കുന്ന അരിജിത്തിന്റെ ഈ ശൈലി രാഷ്ട്രീയത്തിലും അദ്ദേഹത്തിന് വലിയ ജനപിന്തുണ നൽകുമെന്നാണ് കരുതപ്പെടുന്നത്.
പുതുവത്സരാശംസകൾ നേർന്നുകൊണ്ട് ഇൻസ്റ്റാഗ്രാമിലൂടെയാണ് അദ്ദേഹം തന്റെ വിരമിക്കൽ പ്രഖ്യാപനം നടത്തിയത്. ഇത്രയും കാലം നൽകിയ സ്നേഹത്തിന് നന്ദി പറഞ്ഞ അരിജിത്, ഇനി മുതൽ പുതിയ പിന്നണി ഗാന അവസരങ്ങൾ ഏറ്റെടുക്കില്ലെന്ന് വ്യക്തമാക്കുകയായിരുന്നു. ഷാരൂഖ് ഖാൻ മുതൽ രൺബീർ കപൂർ വരെയുള്ള സൂപ്പർ താരങ്ങളുടെ ശബ്ദമായി മാറിയ അരിജിത്തിന്റെ ഈ തീരുമാനം സംഗീത ലോകത്തിന് വലിയൊരു വിടവ് തന്നെയാണ് സൃഷ്ടിക്കുന്നത്.
അരിജിത്തിന്റെ തീരുമാനത്തെ ബഹുമാനിക്കുന്നതായും അതേസമയം അദ്ദേഹത്തിന്റെ ശബ്ദം നഷ്ടപ്പെടുന്നതിൽ വിഷമമുണ്ടെന്നും സഹപ്രവർത്തകർ പ്രതികരിച്ചു. അരിജിത്തിന്റെ പ്രതിഭ ഒരു പ്രത്യേക ചട്ടക്കൂടിൽ ഒതുങ്ങുന്നതല്ലെന്നും അദ്ദേഹത്തിന്റെ ജീവിതത്തിലെ പുതിയ ഘട്ടത്തെ ആകാംക്ഷയോടെയാണ് നോക്കിക്കാണുന്നതെന്നും ശ്രേയ ഘോഷാൽ കുറിച്ചു. കുമാർ സാനു, ബാദ്ഷാ, അർമാൻ മാലിക് തുടങ്ങിയ പ്രമുഖരും അദ്ദേഹത്തിന് ആശംസകളുമായി രംഗത്തെത്തി. പ്രണയത്തിന്റെയും വിരഹത്തിന്റെയും ഒട്ടനവധി ഹിറ്റ് ഗാനങ്ങൾ സമ്മാനിച്ച ഈ അതുല്യ പ്രതിഭ ഇനി ജനസേവനത്തിന്റെ പുതിയ പാതയിലൂടെ സഞ്ചരിക്കാനൊരുങ്ങുമ്പോൾ ഇന്ത്യൻ രാഷ്ട്രീയവും വലിയൊരു മാറ്റത്തിനാണ് സാക്ഷ്യം വഹിക്കാൻ പോകുന്നത്.
