തൃശൂര്:തളിക്കുളത്ത് രാവിലെ ഏഴു മണിയോടെ കെഎസ്ആര്ടിസി ബസും കാറും കൂട്ടിയിടിച്ചുണ്ടായ അപകടത്തിൽ രക്ഷാപ്രവർത്തനത്തിനിടെ ബസ് യാത്രക്കാരിയായ യുവതിയുടെ മാലമോഷ്ടിക്കാൻ ശ്രമിച്ച പ്രതിയെ കയ്യോടെ പൊക്കി നാട്ടുകാർ. കാഞ്ഞാണി സ്വദേശി ബാബുവിനെയാണ് നാട്ടുകാര് പിടികൂടിയത്. രക്ഷാപ്രവർത്തനത്തിനിടെ ബാബു ബസ്യാത്രക്കാരിയുടെ മാല പൊട്ടിക്കാൻ ശ്രമിക്കുന്നത് നാട്ടുകാരുടെ ശ്രദ്ധയിൽപെടുകയായിരുന്നു.
അതേസമയം കൊപ്രക്കളത്ത് രാവിലെ ഏഴു മണിയോടെ കെഎസ്ആര്ടിസി ബസും കാറും കൂട്ടിയിടിച്ചുണ്ടായ അപകടത്തിൽ കാര് യാത്രക്കാരായ പറവൂര് തട്ടാന്പടി സ്വദേശികളായ പുത്തന്പുരയില് പത്മനാഭന് (81), ഭാര്യ പാറുക്കുട്ടി (79) എന്നിവര് മരിച്ചിരുന്നു. മകന് ഷാജു (49), ഭാര്യ ശ്രീജ (44), മകള് അഭിരാമി (11), ബസ് യാത്രക്കാരനായ കാക്കശ്ശേരി സ്വദേശി സത്യന് എന്നിവരെ പരിക്കുകളോടെ ആശുപത്രിയില് പ്രവേശിപ്പിച്ചിരിക്കുകയാണ്.ഗുരുവായൂര് ഭാഗത്തേക്ക് പോവുകയായിരുന്ന കാര് എതിരെ വന്ന കെഎസ്ആര്ടിസി ബസില് ഇടിക്കുകയായിരുന്നു. ഡ്രൈവര് ഉറങ്ങി പോയതാണ് അപകടത്തിന് കാരണമായതെന്നാണ് നിഗമനമെന്ന് പൊലീസ് പറഞ്ഞു.
