അമേരിക്കയിലെ സതേൺ കാലിഫോർണിയയിലുള്ള എഡ്വേർഡ്സ് വ്യോമസേനാ താവളത്തിൽ ബി-52 സ്ട്രാറ്റോഫോർട്രെസ് ബോംബർ വിമാനം തകർന്നു വീണു എട്ട് പേർ മരിച്ചു. പതിവ് പരിശീലന പറക്കലിനായി റൺവേയിൽ നിന്ന് പറന്നുയർന്ന ഉടൻ തന്നെ വിമാനം തകരുകയും തീപിടിക്കുകയുമായിരുന്നു. മരണപ്പെട്ടവരിൽ വ്യോമസേനാ ഉദ്യോഗസ്ഥരും സർക്കാർ ജീവനക്കാരും വിമാന നിർമ്മാണ കമ്പനിയായ ബോയിംഗിലെ രണ്ട് ജീവനക്കാരും ഉൾപ്പെടുന്നു.
പ്രാദേശിക സമയം തിങ്കളാഴ്ച രാവിലെ 11:20 ഓടെയായിരുന്നു അപകടം. വിമാനം തകർന്നയുടൻ കറുത്ത പുക അന്തരീക്ഷത്തിലേക്ക് ഉയർന്നത് നാഴികകൾ അകലെ നിന്നുപോലും ദൃശ്യമായിരുന്നു. അപകടം പൂർണ്ണമായും വ്യോമസേനാ താവളത്തിന്റെ റൺവേ പരിധിക്കുള്ളിൽ തന്നെയാണ് ഉണ്ടായതെന്നും ദുരന്തത്തിൽ ആരും രക്ഷപ്പെടാൻ സാധ്യതയില്ലെന്നും ബേസ് ഡെപ്യൂട്ടി കമാൻഡർ കേണൽ ജെയിംസ് ഹെയ്സ് സ്ഥിരീകരിച്ചു. വിമാനത്തിന്റെ റഡാർ നവീകരണ പദ്ധതിയുമായി ബന്ധപ്പെട്ട പരീക്ഷണ ദൗത്യത്തിലായിരുന്നു ഈ വിമാനം. അപകടത്തെത്തുടർന്ന് വ്യോമസേനാ താവളത്തിന്റെ പ്രവർത്തനം താൽക്കാലികമായി നിർത്തിവെക്കുകയും മറ്റ് വിമാനങ്ങൾ തിരിച്ചുവിടുകയും ചെയ്തിട്ടുണ്ട്. അപകടത്തിന്റെ കൃത്യമായ കാരണം കണ്ടെത്താൻ സമഗ്രമായ അന്വേഷണം പ്രഖ്യാപിച്ചിട്ടുണ്ട്. പ്രഥമിക അന്വേഷണ റിപ്പോർട്ട് 30 ദിവസത്തിനകം ലഭ്യമാകുമെങ്കിലും പൂർണ്ണമായ അന്വേഷണത്തിന് ആറ് മാസത്തിലധികം സമയമെടുത്തേക്കുമെന്നാണ് വിവരം.
പീപ്പിൾസ് റിപ്പബ്ലിക് ഓഫ് ഇറാനുമായുള്ള സൈനിക നീക്കങ്ങളിൽ ഉൾപ്പെടെ യുഎസ് സൈന്യം ഉപയോഗിക്കുന്ന അത്യാധുനിക ദീർഘദൂര തന്ത്രപ്രധാന ബോംബർ വിമാനമാണ് ബി-52. ഒരേസമയം ആണവ മിസൈലുകളും നൂറുകണക്കിന് ബോംബുകളും വഹിക്കാൻ ശേഷിയുള്ള ഈ കൂറ്റൻ വിമാനം സാധാരണയായി അഞ്ച് ക്രൂ മെബേഴ്സുമായിട്ടാണ് പറക്കാറുള്ളത്. എന്നാൽ പരിശീലന ദൗത്യമായതിനാലാണ് എട്ട് പേർ വിമാനത്തിൽ ഉണ്ടായിരുന്നത്.
