ഹൈദരാബാദ് : ഇന്ത്യൻ നാവികസേനയുടെ പ്രവർത്തനങ്ങളെ പിന്തുണയ്‌ക്കുക എന്ന ലക്ഷ്യത്തോടെയുള്ള
ഐഎസ്‌ആർഒയുടെ 4,000 കിലോഗ്രാമിലധികം ഭാരമുള്ള ആശയവിനിമയ ഉപഗ്രഹമായ സിഎംഎസ് 03 (CMS 03) വിജയകരമായി വിക്ഷേപിച്ചു. വൈകുന്നേരം 5.26ഓടെ ആന്ധ്രാപ്രദേശിലെ ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിലെ വിക്ഷേപണത്തറയിൽ നിന്ന് ഐഎസ്‌ആർഒയുടെ വിശ്വസ്തനായ “ബാഹുബലി” എന്നറിയപ്പെടുന്ന എൽവിഎം3- എം5 (LVM3-M5) റോക്കറ്റിലാണ് ഉപഗ്രഹം വിക്ഷേപിച്ചത്.
ഏകദേശം 4,410 കിലോ ആണ് CMS 03 സാറ്റലൈറ്റിന്‍റെ ഭാരം. ഇന്ത്യയിൽ നിന്ന് വിക്ഷേപിക്കപ്പെടുന്ന ഏറ്റവും ഭാരമേറിയതും, ജിയോ സിൻക്രണസ് ട്രാൻസ്‌ഫർ ഓർബിറ്റിലേക്ക് വിക്ഷേപിക്കപ്പെടുന്നതുമായ CMS 03 ഒരു മൾട്ടി-ബാൻഡ് സൈനിക ആശയവിനിമയ ഉപഗ്രഹമാണ്.ഇത്രയും ഭാരമേറിയ വാർത്താവിനിമയ ഉപഗ്രഹം ഇന്ത്യയിൽ വികസിപ്പിച്ചത് ഇതാദ്യമായാണ്.
ഇന്ത്യൻ നാവികസേനയ്ക്ക് മാത്രമുള്ള ഒരു സൈനിക ആശയവിനിമയ ഉപഗ്രഹമായി CMS-03 പ്രവർത്തിക്കും. കൂടാതെ നിർണായക സമുദ്ര മേഖലകളിലുടനീളം ഉപഗ്രഹത്തിന്‍റെ പ്രവർത്തന പരിധി ശക്തിപ്പെടുത്തുകയും ചെയ്യും. ഉയർന്ന ശേഷിയുള്ള ബാൻഡ്‌വിഡ്ത്ത് വാഗ്‌ദാനം ചെയ്യാൻ ഈ ഉപഗ്രഹത്തിന് സാധിക്കും. അതുവഴി വിദൂര പ്രദേശങ്ങളിലേക്കുള്ള ഡിജിറ്റൽ ആക്‌സസ് മെച്ചപ്പെടുത്താനും കഴിയും. സിവിലിയൻ ഏജൻസികളെ സഹായിക്കാനും തന്ത്രപരമായ ആപ്ലിക്കേഷനുകൾ മെച്ചപ്പെടുത്താനും CMS-03 ഉപഗ്രഹത്തിന്‍റെ സഹായം ലഭിക്കും. വോയ്‌സ്, ഡാറ്റ, വീഡിയോ എന്നിവ വഴിയുള്ള ആശയവിനിമയം സുരക്ഷിതവും വേഗത്തിലുമാക്കാൻ ഇത് സഹായിക്കും. മെച്ചപ്പെട്ട കവറേജ് ലഭിക്കുന്നതോടെ ഇത് സമുദ്ര നിരീക്ഷണം വർധിപ്പിക്കുന്നതിനും നാവിക നിയന്ത്രണം ശക്തിപ്പെടുത്തുന്നതിനും സഹായിക്കും.
