റിയാദ് : സ്പാനിഷ് ക്ലബ്ബ് റയല് മാഡ്രിഡ് വിട്ട ഫ്രഞ്ച് സ്ട്രൈക്കര് കരീം ബെന്സിമ സൗദി പ്രൊ ലീഗിലേക്ക് ചേക്കേറി. അല്-ഇത്തിഹാദുമായാണ് ബെൻസിമ കരാര് ഒപ്പിട്ടിരിക്കുന്നത്. താരത്തിന്റെ കൂടുമാറ്റം സൗദി ലീഗിലേക്കായിരിക്കുമെന്ന് നേരത്തെ തന്നെ റിപ്പോർട്ടുകളുണ്ടായിരുന്നു.
കരാറിലെ പ്രധാന കാര്യങ്ങളില് താരവും ക്ലബ്ബും തമ്മില് ധാരണയിലെത്തിയതായും 2025 വരെയാകും ക്ലബ്ബുമായുള്ള ബെന്സിമയുടെ കരാറെന്നും കായിക മാദ്ധ്യമപ്രവര്ത്തകന് ഫാബ്രിസിയോ റൊമാനോ ട്വീറ്റ് ചെയ്തു. ഒരു സീസണില് 882 കോടിയോളം രൂപയാണ് ക്ലബ്ബ് താരത്തിന് വാഗ്ദാനം ചെയ്തിരുന്നത്.
സൗദി പ്രോ ലീഗിലെ ഇത്തവണത്തെ ചാമ്പ്യന്മാരാണ് അല്-ഇത്തിഹാദ്. റയൽ മാഡ്രിഡിൽ ബെൻസിമയുടെ സഹതാരമായിരുന്ന ക്രിസ്റ്റിയാനോ റൊണാൾഡോ നയിക്കുന്ന അൽ നസറാണ് അല്-ഇത്തിഹാദിന്റെ പ്രധാന എതിരാളികൾ. ഇതോടെ സൗദി ലീഗില് ക്രിസ്റ്റിയാനോ റൊണാള്ഡോ – ബെന്സിമ പോരിന് കളമൊരുങ്ങി.