മുംബൈ: വിവാഹ വാഗ്ദാനം നല്കി ബീഹാര് സ്വദേശിനിയെ ലൈംഗികമായി പീഡിപ്പിച്ച കേസില് ബിനോയ് കോടിയേരി ഇന്ന് വീണ്ടും മുംബൈ ഓഷിവാര പൊലീസ് സ്റ്റേഷനില് ഹാജരാകും. ആരോഗ്യ പ്രശ്നങ്ങളോ മറ്റ് തടസ്സങ്ങളോ ഇല്ലെങ്കില് ഡിഎന്എ പരിശോധനയ്ക്കായി ബിനോയിയുടെ രക്ത സാമ്പിള് ഇന്ന് ശേഖരിക്കും. സ്റ്റേഷനില് ഹാജരാകുന്ന ബിനോയിയെ ജുഹുവിലെ കൂപ്പര് ആശുപത്രിയില് എത്തിച്ച് രക്ത സാമ്പിള് എടുക്കുമെന്നാണ് സൂചന.
കഴിഞ്ഞ തവണ ഹാജരായപ്പോള് ആരോഗ്യകാരണങ്ങള് ചൂണ്ടിക്കാട്ടി ബിനോയ് രക്ത സാമ്പിള് നല്കിയിരുന്നില്ല. വിവാഹ വാഗ്ദാനം നല്കി പീഡിപ്പിച്ചുവെന്നും ബിനോയിയുമായുള്ള ബന്ധത്തില് എട്ടു വയസ്സുള്ള കുട്ടിയുണ്ടെന്നുമാണ് യുവതിയുടെ പരാതി. ഒരു മാസത്തേക്ക് എല്ലാ തിങ്കളാഴ്ച്ചയും രാവിലെ പത്തുമണിക്കും ഉച്ചയ്ക്ക് ഒന്നിനും ഇടയില് അന്വേഷണ ഉദ്യോഗസ്ഥനുമുന്നില് ഹാജരാകണമെന്ന വ്യവസ്ഥയിലാണ് ബിനോയിക്ക് മുംബൈ ഡിണ്ടോഷി സെഷന്സ് കോടതി മുന്കൂര്ജാമ്യം അനുവദിച്ചത്.
കുഞ്ഞിന്റെ പിതൃത്വം തെളിയിക്കുന്നതിന് യുവതി ആവശ്യപ്പെട്ടത് അനുസരിച്ചാണ് ഡിഎന്എ പരിശോധന നടത്താന് അന്വേഷണ സംഘം തയ്യാറാകുന്നത്. അന്വേഷണ ഉദ്യോഗസ്ഥന് ആവശ്യപ്പെട്ടാല് ഡിഎന്എ പരിശോധനയ്ക്ക് രക്തസാംപിള് നല്കണമെന്ന് മുംബൈ കോടതിയും ബിനോയ് കോടിയേരിയോട് നിര്ദേശിച്ചിരുന്നു