Thursday, November 19, 2026

ശബരിമല തീർത്ഥാടകരുടെ അധിക യാത്രാനിരക്ക് കുറയ്ക്കണം സൗജന്യ ബസ് സർവീസിന് സംഘടനകളെ അനുവദിക്കണം: ബിജെപി

തിരുവനന്തപുരം : ശബരിമല മണ്ഡല മകരവിളക്ക് തീർത്ഥാടനത്തോടനുബന്ധിച്ച് നിലയ്ക്കൽ–പമ്പ റൂട്ടിൽ കെ.എസ്.ആർ.ടി.സി. ഈടാക്കുന്ന അധിക യാത്രാനിരക്ക് കുറയ്ക്കണമെന്ന് ബിജെപി സംസ്ഥാന ജനറൽ സെക്രട്ടറി അനൂപ് ആന്റണി ആവശ്യപ്പെട്ടു. സാധാരണ യാത്രാനിരക്ക് ഈടാക്കാൻ സർക്കാർ തയ്യാറാകണം. അതിന് കഴിയാത്തപക്ഷം തീർത്ഥാടകർക്ക് സൗജന്യ ബസ് സർവീസ് നടത്താൻ സന്നദ്ധരായ ഭക്തജന സംഘടനകളെ അതിനായി ചുമതലപ്പെടുത്തണമെന്നും അദ്ദേഹം ആവശ്യപ്പെട്ടു. ഇക്കാര്യങ്ങൾ ഉന്നയിച്ച് ഗതാഗത മന്ത്രി സി.പി. ജോണിന് അനൂപ് ആന്റണി നിവേദനം നൽകി.

നിലയ്ക്കലിൽ നിന്ന് പമ്പയിലേക്കുള്ള 22 കിലോമീറ്റർ യാത്രയ്ക്ക് ഒരാൾക്ക് 50 രൂപയാണ് കെ.എസ്.ആർ.ടി.സി. ഈടാക്കുന്നത്. മടക്കയാത്രയ്ക്കുള്ള തുകയും മുൻകൂറായി നൽകണം. എന്നാൽ സമാന ദൂരത്തിലുള്ള സാധാരണ യാത്രയ്ക്ക് കെ.എസ്.ആർ.ടി.സി. ഈടാക്കുന്ന നിരക്ക് ഏകദേശം 35 രൂപ മാത്രമാണെന്ന് അനൂപ് ആന്റണി ചൂണ്ടിക്കാട്ടി. രാജ്യത്തിന്റെ വിവിധ ഭാഗങ്ങളിൽ നിന്ന് ശബരിമലയിലെത്തുന്ന സാധാരണക്കാരായ ഭക്തർക്ക് അധിക സാമ്പത്തികഭാരം സൃഷ്ടിക്കുന്ന നടപടി അവസാനിപ്പിക്കണമെന്നും അദ്ദേഹം ആവശ്യപ്പെട്ടു. ശബരിമല തീർത്ഥാടനം വിനോദയാത്രയല്ലെന്നും തിരുപ്പതി പോലുള്ള തീർത്ഥാടന കേന്ദ്രങ്ങളിൽ ഭക്തർക്ക് സൗജന്യ യാത്രാസൗകര്യങ്ങൾ ലഭ്യമാകുമ്പോൾ ശബരിമലയിൽ അധിക നിരക്ക് ഈടാക്കുന്നത് അംഗീകരിക്കാനാവില്ലെന്നും അദ്ദേഹം പറഞ്ഞു.

നിലയ്ക്കൽ–പമ്പ റൂട്ടിൽ ആവശ്യത്തിന് ബസുകൾ ഇല്ലാത്തതിനാൽ തീർത്ഥാടകർക്ക് മണിക്കൂറുകളോളം കാത്തുനിൽക്കേണ്ടിവരുന്നതും ബസുകളിൽ അമിതമായി ആളുകളെ കയറ്റി യാത്ര ചെയ്യേണ്ടിവരുന്നതും നിവേദനത്തിൽ ചൂണ്ടിക്കാട്ടി. കൂടുതൽ ബസുകൾ അനുവദിച്ച് സർവീസുകളുടെ ഇടവേള കുറയ്ക്കണമെന്നും നിലയ്ക്കലിൽ കാത്തുനിൽക്കുന്ന തീർത്ഥാടകർക്ക് ആവശ്യമായ അടിസ്ഥാന സൗകര്യങ്ങൾ ഒരുക്കണമെന്നും ആവശ്യപ്പെട്ടു. സൗജന്യ ബസ് സർവീസ് നടത്താൻ സന്നദ്ധരായ ഭക്തജന സംഘടനകൾക്ക് സർക്കാർ അനുമതി നൽകണം. കെ.എസ്.ആർ.ടി.സി. അധിക നിരക്ക് കുറയ്ക്കാൻ തയ്യാറായില്ലെങ്കിൽ ഇത്തരം സംഘടനകളുടെ സേവനം പ്രയോജനപ്പെടുത്തണമെന്നും തീർത്ഥാടകരുടെ യാത്രാക്ലേശം പരിഹരിക്കാൻ കേന്ദ്രസർക്കാരിന്റെ ഇടപെടൽ ആവശ്യമായാൽ ബിജെപി പിന്തുണ നൽകുമെന്നും അനൂപ് ആന്റണി വ്യക്തമാക്കി.

Related Articles

Latest Articles