ദില്ലി: അയോധ്യയിലെ രാമക്ഷേത്രത്തിന്റെ നിർമാണത്തിനായി മുൻ ഇന്ത്യൻ ക്രിക്കറ്റ് താരവും ഈസ്റ്റ് ദില്ലിയിലെ ബിജെപി എംപിയുമായ ഗൗതം ഗംഭീർ ഒരുകോടി രൂപ സംഭാവന നല്‍കി.
‘ഒരു മഹത്തായ രാമക്ഷേത്രം എല്ലാ ഇന്ത്യക്കാരുടെയും സ്വപ്‌നമാണ്. അവസാനം ദീർഘനാളായി നിലനിന്നിരുന്ന പ്രശ്‌നത്തിന് പരിഹാരമായിരിക്കുന്നു. ഇത് ഐക്യത്തിനും സമാധാനത്തിനും വഴിയൊരുക്കും. ഇതിനായി എന്റെയും എന്റെ കുടുംബത്തിന്റെയും ഒരു ചെറിയ സംഭാവന’. ഗംഭീർ പ്രസ്താവനയിലൂടെ വ്യക്തമാക്കി.
രാമക്ഷേത്ര നിര്‍മാണത്തിനായി നഗരത്തിലുടനീളം സംഭാവന പിരിക്കാനുള്ള പ്രചരണ പരിപാടി ദില്ലി ബി.ജെ.പി ആരംഭിച്ചതായി പാര്‍ട്ടി നേതാക്കള്‍ പറഞ്ഞു. 10, 100, 1000 എന്നിങ്ങനെയുള്ള തുകകളുടെ കൂപ്പണ്‍ ഉപയോഗിച്ചാണ് പിരിവ് നടക്കുന്നത്. സാധ്യമായ തുക എല്ലാ കുടുംബങ്ങള്‍ക്കും നല്‍കാമെന്ന് ദില്ലി ബിജെപി ജനറല്‍ സെക്രട്ടറി കുല്‍ജീത് ചഹല്‍ പറഞ്ഞു. രാമക്ഷേത്ര ഫണ്ട് പിരിവിന് ദില്ലിയിലെ പ്രചാരണത്തിന്റെ കണ്‍വീനറാണ് ഇദ്ദേഹം. 1000 രൂപയ്ക്ക് മുകളിലുള്ള തുക ചെക്ക് ആയിട്ടാണ് നല്‍കേണ്ടത്.
