ദില്ലി: കെ റെയില്‍ വിഷയത്തില്‍ ബിജെപി പ്രതിനിധി സംഘം ദില്ലിയിലെത്തി (Kerala BJP Representatives In Delhi). പദ്ധതിക്ക് അനുമതി നല്‍കരുതെന്ന് സംഘം റെയില്‍വേ മന്ത്രാലയത്തോട് ആവശ്യപ്പെടുമെന്നാണ് സൂചന. വിഷയവുമായി ബന്ധപ്പെട്ട് ബിജെപി സംസ്ഥാന അധ്യക്ഷന്‍ കെ സുരേന്ദ്രന്റെ നേതൃത്വത്തിലുള്ള സംഘമാണ് കേന്ദ്ര റെയില്‍വേ മന്ത്രിയുമായി കൂടിക്കാഴ്ച നടത്തുക. പ്രതിനിധി സംഘത്തില്‍ മെട്രോമാന്‍ ഇ. ശ്രീധരനും, കേന്ദ്ര സഹമന്ത്രി വി. മുരളീധരനും, കുമ്മനം രാജശേഖരനും, പികെ കൃഷ്ണദാസ് എന്നിവരും ഉണ്ട്.
അതേസമയം കെ റെയിൽ പദ്ധതിയെ പൂര്‍ണമായും എതിര്‍ക്കുന്ന ബിജെപി തങ്ങളുടെ നീക്കങ്ങള്‍ക്കും എതിര്‍പ്പിനും കൂടുതല്‍ ശക്തി പകരുന്നതിനാണ് ദില്ലിയിലേക്ക് പോയിരിക്കുന്നത്. പദ്ധതിക്ക് ഒരു കാരണവശാലും അനുമതി നല്‍കരുതെന്ന ആവശ്യമാണ് കേന്ദ്ര റെയില്‍വേ മന്ത്രി അശ്വിനി വൈഷ്ണവിന് മുന്‍പില്‍ സംഘം ഉന്നയിക്കുക.
കെ റെയിലിനെതിരെ വലിയ പ്രക്ഷോഭപരിപാടികളാണ് ബിജെപി സംഘടിപ്പിക്കുന്നത്. ഇതിന് കേന്ദ്ര മന്ത്രാലയത്തിന്റെയും കേന്ദ്ര നേതൃത്വത്തിന്റേയും പിന്തുണ തേടിയാണ് സംഘത്തിന്റെ ദില്ലി യാത്ര.
മെട്രോമാന്‍ ഇ ശ്രീധരനെ കൂടി ഉള്‍പ്പെടുത്തിയിരിക്കുന്നത് പദ്ധതി കേരളത്തില്‍ നടപ്പാക്കുന്നതിലെ ദോഷവശങ്ങള്‍ കൂടി കേന്ദ്രത്തെ ബോധ്യപ്പെടുത്താനാണ് എന്നാണ് പുറത്തുവരുന്ന വിവരം.
