ദില്ലി : കേരളത്തിലും ബിജെപി അധികാരത്തിലേറുമെന്ന ആത്മവിശ്വാസം പങ്കുവച്ച് പ്രധാനമന്ത്രി നരേന്ദ്ര മോദി. ന്യൂനപക്ഷങ്ങള്ക്കെതിരാണ് ബിജെപിയെന്ന തെറ്റായ ധാരണ കേരളത്തിലും തകര്ക്കപ്പെടുമെന്നും ബിജെപി കേരളത്തിൽ സര്ക്കാര് രൂപീകരിക്കുമെന്നും പ്രധാനമന്ത്രി പറഞ്ഞു. വടക്ക് കിഴക്കന് സംസ്ഥാനങ്ങളിലെ തെരഞ്ഞെടുപ്പില് ബിജെപി നേടിയ തകർപ്പൻ വിജയത്തിൽ ദില്ലിയിലെ ബിജെപി ആസ്ഥാനത്ത് പ്രവര്ത്തകരെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം .
കേരളത്തിലും ബിജെപി സര്ക്കാര് രൂപീകരിക്കുമെന്നും കോണ്ഗ്രസും ഇടതും ഒരുപോലെയാണെന്ന് ത്രിപുര തെരഞ്ഞെടുപ്പ് തെളിയിച്ചിട്ടുണ്ടെന്നും കേരളത്തിലെ ജനങ്ങള്ക്ക് യഥാര്ത്ഥ ബദല് ഭാരതീയ ജനതാ പാർട്ടി നല്കുമെന്നും പ്രധാനമന്ത്രി വ്യക്തമാക്കി.
‘വര്ഷങ്ങളായി ബിജെപിയുടെ പേരില് ന്യൂനപക്ഷങ്ങളെ ഭീഷണിയിലാഴ്ത്തുന്നുണ്ട്. ഗോവയ്ക്ക് ശേഷം ക്രിസ്ത്യന് സമൂഹം താമസിക്കുന്ന വടക്ക് കിഴക്കന് സംസ്ഥാനങ്ങളിലും ഈ മിഥ്യ തകര്ന്ന് തുടങ്ങിയിരിക്കുന്നു. പ്രതിപക്ഷത്തെ തുറന്ന് കാട്ടപ്പെടുകയാണ്. നമുക്കെതിരെയുള്ള മിഥ്യാധാരണ കേരളത്തിലും തകര്ക്കപ്പെടുമെന്ന് ഞങ്ങള് ഇപ്പോള് ആത്മവിശ്വാസത്തിലാണ് പല രാഷ്ട്രീയ നിരീക്ഷകരും ബിജെപിയുടെ വിജയത്തിന്റെ രഹസ്യം മനസ്സിലാക്കാന് ശ്രമിക്കുന്നുണ്ട്. നമ്മുടെ ചില അഭ്യുദയകാംക്ഷികള്ക്കും അതിന്റെ കാരണം അറിയണം. ‘ത്രിവേണി’യാണ് അതിന്റെ കാരണം. ത്രിവേണിയെന്നാല് മൂന്ന് ധാരകളുടെ സംയോജനമാണ്. അതില് ഒന്നാമത്തേത് ബിജെപി സര്ക്കാരുകളുടെ പ്രവര്ത്തനം. രണ്ടാമത്തേത് ബിജെപിയുടെ പ്രവര്ത്തന ശൈലിയാണ്. മൂന്നാമത്തേത് ബിജെപിയുടെ പ്രവര്ത്തകരാണ്’ അദ്ദേഹം പറഞ്ഞു.
