ദില്ലി : ആഗോള സുരക്ഷാ വെല്ലുവിളികളും ഭീകരവാദ വിരുദ്ധ പോരാട്ടങ്ങളും ചർച്ച ചെയ്യുന്നതിനായി ബ്രിക്സ് രാജ്യങ്ങളിലെ ദേശീയ സുരക്ഷാ ഉപദേശകരുടെ രണ്ട് ദിവസത്തെ നിർണായക യോഗത്തിന് ഇന്ന് ദില്ലിയിൽ തുടക്കമാകും. ഇന്നും നാളെയുമായി നടക്കുന്ന ഈ ഉന്നതതല യോഗത്തിന് ദേശീയ സുരക്ഷാ ഉപദേശകൻ അജിത് ഡോവൽ അദ്ധ്യക്ഷത വഹിക്കും. ഈ വർഷത്തെ ബ്രിക്സ് കൂട്ടായ്മയുടെ താൽക്കാലിക അദ്ധ്യക്ഷ പദവി ഇന്ത്യയ്ക്കായതിനാൽ, വരാനിരിക്കുന്ന ബ്രിക്സ് ഉച്ചകോടിയുടെ രാഷ്ട്രീയവും നയതന്ത്രപരവുമായ മുന്നൊരുക്കങ്ങൾക്ക് ഈ യോഗം സാക്ഷ്യം വഹിക്കും.
ലോകം ഇന്ന് അഭിമുഖീകരിക്കുന്ന പരമ്പരാഗതമല്ലാത്ത സുരക്ഷാ വെല്ലുവിളികൾ എന്ന പ്രമേയത്തെ അടിസ്ഥാനമാക്കിയാണ് ഇത്തവണത്തെ ചർച്ചകൾ ക്രമീകരിച്ചിരിക്കുന്നത്. അതിവേഗം മാറിക്കൊണ്ടിരിക്കുന്ന ദേശീയ സുരക്ഷാ പ്രതിസന്ധികളും പുതിയ സാങ്കേതികവിദ്യകൾ ഉയർത്തുന്ന ആധുനിക സുരക്ഷാ ഭീഷണികളും യോഗത്തിൽ ഗൗരവമായി അവലോകനം ചെയ്യും. ഇതിനൊപ്പം അടുത്തിടെ നടന്ന ഭീകരവാദ വിരുദ്ധ പ്രവർത്തനങ്ങൾക്കായുള്ള ബ്രിക്സ് ജോയിന്റ് വർക്കിംഗ് ഗ്രൂപ്പ് യോഗത്തിലെയും വിവരസാങ്കേതികവിദ്യയുടെ സുരക്ഷിതമായ ഉപയോഗത്തെക്കുറിച്ചുള്ള സമിതിയിലെയും തീരുമാനങ്ങളും ഫലങ്ങളും യോഗം വിശദമായി വിലയിരുത്തും.
ചൈനീസ് വിദേശകാര്യ മന്ത്രി വാങ് യി, റഷ്യൻ നാഷണൽ സെക്യൂരിറ്റി അഡ്വൈസർ സെർജി ഷോയിഗു, ഇറാന്റെ സുപ്രീം നാഷണൽ സെക്യൂരിറ്റി കൗൺസിൽ ഡെപ്യൂട്ടി സെക്രട്ടറി നെസാമിപൂർ എന്നിവരുൾപ്പെടെയുള്ള പ്രമുഖ നയതന്ത്ര പ്രതിനിധികൾ യോഗത്തിൽ പങ്കെടുക്കാൻ ഇന്ത്യയിലെത്തുന്നുണ്ട്. നിലവിലെ അന്താരാഷ്ട്ര സുരക്ഷാ സാഹചര്യങ്ങളും പ്രാദേശിക പ്രതിസന്ധികളും സംയുക്തമായി നേരിടാൻ ചൈന പൂർണ്ണ പിന്തുണ പ്രഖ്യാപിച്ചിട്ടുണ്ടെന്ന് ഇന്ത്യയിലെ ചൈനീസ് അംബാസഡർ സു ഫീഹോങ് വ്യക്തമാക്കി. സെപ്റ്റംബറിൽ ഇന്ത്യയിൽ നടക്കാനിരിക്കുന്ന ബ്രിക്സ് ഉച്ചകോടിക്ക് മുന്നോടിയായി അംഗരാജ്യങ്ങൾ തമ്മിലുള്ള സുരക്ഷാ സഹകരണം ശക്തമാക്കാൻ ഈ യോഗം വഴിതെളിക്കും.
ബ്രസീൽ, റഷ്യ, ഇന്ത്യ, ചൈന, ദക്ഷിണാഫ്രിക്ക എന്നീ സ്ഥാപക രാജ്യങ്ങൾക്ക് പുറമെ ഈജിപ്ത്, എത്യോപ്യ, ഇന്തോനേഷ്യ, ഇറാൻ, സൗദി അറേബ്യ, യുണൈറ്റഡ് അറബ് എമിറേറ്റ്സ് എന്നീ രാജ്യങ്ങൾ ഉൾപ്പെടെ 11 അംഗങ്ങളാണ് നിലവിൽ ഈ ശക്തമായ ആഗോള കൂട്ടായ്മയിലുള്ളത്. രാഷ്ട്രീയ-സുരക്ഷാ മേഖലകളിലെ പരസ്പര സഹകരണം വർദ്ധിപ്പിക്കുന്നതിനൊപ്പം ആഗോള സമാധാനത്തിനും സുരക്ഷിതത്വത്തിനും പുതിയ ദിശാബോധം നൽകാൻ ഇന്ത്യയുടെ നേതൃത്വത്തിൽ നടക്കുന്ന ഈ യോഗത്തിന് സാധിക്കുമെന്നാണ് വിലയിരുത്തപ്പെടുന്നത്.
