ദോഹ : ലോകത്തിലെ ഏറ്റവും വലിയ പ്രകൃതിവാതക ഉൽപ്പാദന കേന്ദ്രങ്ങളിലൊന്നായ ഖത്തറിലെ റാസ് ലഫാൻ വ്യവസായ മേഖലയിലുണ്ടായ സ്ഫോടനത്തിലും തീപിടുത്തത്തിലും 54 പേർക്ക് പരിക്കേറ്റു. ഇന്നലെ രാത്രിയോടെയുണ്ടായ സ്ഫോടനത്തിന് പിന്നാലെ 18 തൊഴിലാളികളെ കാണാതായിട്ടുണ്ടെന്നും ഇവർക്കായുള്ള തിരച്ചിൽ ഊർജ്ജിതമായി തുടരുകയാണെന്നും ഖത്തർ ആഭ്യന്തര മന്ത്രാലയം ഔദ്യോഗികമായി സ്ഥിരീകരിച്ചു. മേഖലയിലെ യുദ്ധസമാനമായ സാഹചര്യങ്ങൾക്കിടെ നേരത്തെ ഇറാന്റെ ബോംബാക്രമണത്തിൽ തകർന്ന വാതക വിതരണ കേന്ദ്രത്തിന്റെ പ്രവർത്തനം പുനരാരംഭിക്കാൻ ശ്രമിക്കുന്നതിനിടയിലാണ് അപകടം സംഭവിച്ചത്.
ഹോർമൂസ് കടലിടുക്കിൽ ഇറാൻ ഏർപ്പെടുത്തിയ ഉപരോധം കാരണം അന്താരാഷ്ട്ര വിപണിയിലേക്ക് ഇന്ധനക്കയറ്റുമതി നടത്താൻ സാധിക്കാതെ വന്നതോടെ ഖത്തർ തങ്ങളുടെ പ്രകൃതിവാതക ഉൽപ്പാദനം താൽക്കാലികമായി നിർത്തിവെച്ചിരിക്കുകയായിരുന്നു. എന്നാൽ പശ്ചിമേഷ്യൻ സമാധാന ചർച്ചകൾ പുരോഗമിക്കുന്ന പശ്ചാത്തലത്തിൽ, ഹോർമൂസ് കടലിടുക്കിലെ കർശന നിയന്ത്രണങ്ങളിൽ ഇറാൻ നേരിയ ഇളവുകൾ വരുത്തിയതോടെയാണ് കയറ്റുമതി കേന്ദ്രം വീണ്ടും സജ്ജമാക്കാൻ ഖത്തർ നടപടികൾ തുടങ്ങിയത്. ഇതിന്റെ ഭാഗമായി റാസ് ലഫാനിലെ ‘ബർസാൻ’ ഗ്യാസ് സപ്ലൈ ഫെസിലിറ്റിയിൽ ഉദ്യോഗസ്ഥർ പ്രവർത്തനം പുനരാരംഭിക്കാൻ ശ്രമിച്ചപ്പോൾ ഉണ്ടായ സാങ്കേതിക തകരാറാണ് വൻ സ്ഫോടനത്തിലേക്കും തുടർന്ന് നിയന്ത്രണാതീതമായ തീപിടുത്തത്തിലേക്കും നയിച്ചതെന്ന് സർക്കാർ ഉടമസ്ഥതയിലുള്ള ഖത്തർഎനർജി പ്രസ്താവനയിൽ വ്യക്തമാക്കി.
അപകടത്തിന്റെ ആദ്യ മണിക്കൂറുകളിൽ വളരെ കുറച്ചുപേർക്ക് മാത്രമേ പരിക്കേറ്റിട്ടുള്ളൂ എന്നായിരുന്നു ഔദ്യോഗിക വിശദീകരണമെങ്കിലും പിന്നീട് ആഭ്യന്തര മന്ത്രാലയം പുറത്തുവിട്ട കണക്കുകൾ ദുരന്തത്തിന്റെ വ്യാപ്തി വ്യക്തമാക്കുന്നതായിരുന്നു. ഖത്തറിന്റെ ആഭ്യന്തര ആവശ്യങ്ങൾക്കുള്ള വൈദ്യുതി ഉൽപ്പാദിപ്പിക്കുന്നതിനും മരുഭൂമിയിലെ ജലശുദ്ധീകരണ പ്ലാന്റുകളുടെ സുഗമമായ പ്രവർത്തനത്തിനും ആവശ്യമായ ഇന്ധനം നൽകുന്ന ഖത്തറിലെ ഏറ്റവും തന്ത്രപ്രധാനമായ പ്ലാന്റുകളിൽ ഒന്നാണ് തകർന്ന ബർസാൻ കേന്ദ്രം. പ്രതിദിനം 140 കോടി ക്യുബിക് അടി വാതകം ഉൽപ്പാദിപ്പിക്കാൻ ശേഷിയുള്ള ഈ പ്ലാന്റിന്റെ ഭൂരിഭാഗം ഓഹരികളും ഖത്തറിന്റെ കൈവശമാണെങ്കിലും അമേരിക്കൻ എണ്ണക്കമ്പനിയായ എക്സോൺ മൊബിലിനും ഇതിൽ ചെറിയൊരു പങ്ക് പങ്കാളിത്തമുണ്ട്.
കഴിഞ്ഞ മാർച്ച് മാസത്തിൽ ഇറാന്റെ മിസൈൽ ആക്രമണത്തിൽ ഇതേ റാസ് ലഫാൻ പ്ലാന്റിന് കനത്ത നാശനഷ്ടങ്ങൾ സംഭവിച്ചിരുന്നു. തുടർന്നുണ്ടായ യുദ്ധസാഹചര്യങ്ങൾ ഖത്തറിന്റെ സമ്പദ്‌വ്യവസ്ഥയെയും ആഗോള ഇന്ധന വിപണിയെയും ഒരുപോലെ ബാധിച്ചു. പേർഷ്യൻ ഗൾഫിലെ ഏറ്റവും വലിയ പ്രകൃതിവാതക നിക്ഷേപം ഇറാനുമായി പങ്കിടുന്ന രാജ്യം കൂടിയാണ് ഖത്തർ. നിലവിൽ യുണൈറ്റഡ് സ്റ്റേറ്റ്സും ഇറാനും തമ്മിൽ സ്വിറ്റ്സർലൻഡിൽ വെച്ച് നടക്കുന്ന സമാധാന ചർച്ചകളുടെ പ്രധാന മധ്യസ്ഥൻ കൂടിയായ ഖത്തറിന് സ്വന്തം മണ്ണിലുണ്ടായ ഈ പുതിയ സാങ്കേതിക ദുരന്തം ഇരട്ട പ്രഹരമാണ് ഏൽപ്പിച്ചിരിക്കുന്നത്. സിവിൽ ഡിഫൻസ് ടീമുകളുടെ സഹകരണത്തോടെ ക്വാഡ് ഇന്റർനാഷണൽ സെർച്ച് ആൻഡ് റെസ്ക്യൂ ഗ്രൂപ്പ് അപകടസ്ഥലത്ത് കാണാതായവർക്കായി വിപുലമായ രീതിയിലുള്ള രക്ഷാപ്രവർത്തനം നടത്തിവരികയാണ്.
