ലിവർപൂൾ: നഴ്‌സായ മലയാളി യുവതി ലിവർപൂളിൽ മരിച്ചു. കോട്ടയം പാലാ സ്വദേശിയായ മാർട്ടിൻ വി ജോർജിന്റെ ഭാര്യ അനു മാർട്ടിൻ (37) ആണ് മാഞ്ചസ്റ്റർ റോയൽ ആശുപത്രിയിൽ ചികിത്സയിലിരിക്കെ മരിച്ചത്. ലിവർപൂൾ ഹാർട്ട് ആന്റ് ചെസ്റ്റ് ആശുപത്രിയിലെ സ്റ്റാഫ് നഴ്സായി ജോലി ലഭിച്ചതിനെ തുടർന്നാണ് അനു മൂന്നാഴ്ച മുൻപ് ലിവർപൂളിലെത്തുന്നത്
കഴിഞ്ഞ രണ്ട് വർഷത്തിലധികമായി ഇവർ അർബുദ രോഗ ബാധിതയായി ചികിത്സയിലായിരുന്നു. 2011 മുതൽ 2019 വരെ നീണ്ട 8 വർഷം മസ്കറ്റിൽ ജോലി ചെയ്ത അനുവിന് പിന്നീട് ബ്ലഡ് ക്യാൻസർ സ്ഥിരീകരിച്ചു. പിന്നീട് മജ്ജ മാറ്റിവെയ്ക്കൽ ശസ്‍ത്രക്രിയ നടത്തിയതിന്റെ ഫലമായി രോഗം ഏതാണ്ട് ഭേദമായിരുന്നു. നാല് മാസം മുമ്പ് ഭർത്താവ് മാർട്ടിൽ ലിവർപൂളിൽ എത്തിയതിനുപിന്നാലെ ലിവർപൂളിൽ തന്നെ ജോലി നേടി മൂന്നാഴ്ച മുമ്പ് അനുവും ഭർത്താവിന്റെ അടുത്തെത്തി.
എന്നാൽ ലിവർപൂളിലെത്തിയതിന് പിന്നാലെ കടുത്ത ക്ഷീണം അനുഭവപ്പെട്ട അനുവിനെ ലിവർപൂൾ റോയൽ ആശുപത്രിയിലും പിന്നീട് റോയൽ ക്ലാറ്റർബ്രിഡ്ജ് ആശുപത്രിയിലേക്കും മാറ്റിയിരുന്നു. കഴിഞ്ഞയാഴ്ച ആരോഗ്യനില കൂടുതൽ വഷളായതോടെ മാഞ്ചസ്റ്റർ റോയൽ ഇൻഫേർമറി ആശുപത്രിയിലെ ക്രിട്ടിക്കൽ കെയർ വിഭാഗത്തിൽ പ്രവേശിപ്പിച്ചു. ഇവിടെ ചികിത്സയിലിരിക്കെയാണ് മരിച്ചത്. വയനാട് മാനന്തവാടി കാട്ടിക്കുന്ന് വടക്കേടത്ത് വി.പി ജോർജിന്റെയും ഗ്രേസിയുടെയും മകളാണ് അനു. ഏഴും മൂന്നും വയസുള്ള രണ്ട് പെൺകുട്ടികളുണ്ട്.
