എസ്കെഎസ്എസ്എഫ് സംസ്ഥാന വൈസ് പ്രസിഡന്റ് സത്താര്‍ പന്തല്ലൂര്‍ നടത്തിയ കൈവെട്ട് പരാമര്‍ശത്തില്‍ കേസ് രജിസ്റ്റര്‍ ചെയ്തു. അഷ്‌റഫ് കളത്തിങ്ങല്‍പാറയുടെ പരാതിയില്‍ ഐ.പി.സി. 153 വകുപ്പ് പ്രകാരം മലപ്പുറം പോലീസാണ് കേസെടുത്തത്. എസ്കെഎസ്എസ്എഫിന്റെ 35-ാം വാര്‍ഷികസമ്മേളനത്തോടനുബന്ധിച്ച് മലപ്പുറത്ത് നടന്ന മുഖദ്ദസ് സന്ദേശയാത്രയുടെ സമാപനസമ്മേളനത്തിലായിരുന്നു സത്താര്‍ പന്തല്ലൂരിന്റെ വിവാദപരാമര്‍ശം.
സമസ്ത കേരള ജംഇയ്യത്തുല്‍ ഉലമയുടെ പണ്ഡിതന്മാരെ വെറുപ്പിക്കാനും പ്രയാസപ്പെടുത്താനും ആരുവന്നാലും അവരുടെ കൈവെട്ടാന്‍ എസ്കെഎസ്എസ്എഫ് പ്രവര്‍ത്തകരുണ്ടാവുമെന്നും സമസ്ത മുഷാവറ ആ തീരുമാനമെടുത്താല്‍ അത് അംഗീകരിക്കുമെന്നുമായിരുന്നു സത്താര്‍ പന്തല്ലൂരിന്റെ പരാമര്‍ശം.
അതേസമയം കേസുമായി മുന്നോട്ട് പോകുമെന്നും ഒരു പൊതുപ്രവര്‍ത്തകന്‍ എന്ന നിലയില്‍ നാട്ടില്‍ കലാപം ഉണ്ടാകാതിരിക്കാന്‍ ഒരു ശ്രമമെന്ന നിലയിലാണ് പരാതി നല്‍കിയതെന്നും പരാതിക്കാരനായ അഷ്‌റഫ് കളത്തിങ്ങല്‍പാറ വ്യക്തമാക്കി.
