ദില്ലി: അഗസ്റ്റ വെസ്റ്റ്ലാന്ഡ് അഴിമതിക്കേസില്‍ മുന്‍ പ്രതിരോധ സെക്രട്ടറി ശശികാന്ത് ശര്‍മ്മയ്ക്ക് സുപ്രധാന പങ്കുണ്ടെന്ന് സിബിഐ. വിവിഐപി ഹെലികോപ്ടര്‍ ഇടപാടുമായി ബന്ധപ്പെട്ട നിരവധി ചര്‍ച്ചകളില്‍ ഇദ്ദേഹം പങ്കാളിയായിട്ടുണ്ടെന്നാണ് അനുബന്ധ കുറ്റപത്രത്തില്‍ സിബിഐ പറയുന്നത്. മൻമോഹൻ സിങ് സർക്കാരിന്റെ കാലത്ത് അഗസ്റ്റ വെസ്റ്റ്‌ലാൻഡ് ഇടപാടിന് തുടക്കമിടുമ്പോൾ ശശികാന്ത് ശർമ പ്രതിരോധ മന്ത്രാലയ ജോയിന്റ് സെക്രട്ടറി ആയിരുന്നു. 3727 കോടി രൂപ മുടക്കി 12 വിവിഐപി ഹെലികോപ്ടറുകൾ വാങ്ങാനാണ് കരാറായത്. രാഷ്ട്രപതി, ഉപരാഷ്ട്രപതി, പ്രധാനമന്ത്രി മറ്റ് വിശിഷ്ട വ്യക്തിത്വങ്ങള്‍ക്ക് യാത്ര ചെയ്യുന്നതിനുള്ളതാണ് ഈ വിവിഐപി ഹെലികോപക്ടറുകള്‍.
കരാറിൽ തിരിമറി നടത്തുന്നതിന് ഹെലികോപ്റ്ററിന്റെ ഗുണനിലവാരവുമായി ബന്ധപ്പെട്ട നിരവധി മാനഡണ്ഡങ്ങളിൽ വിട്ടുവീഴ്ച ചെയ്തതായി ആരോപിക്കപ്പെടുന്നു. കാബിന്റെ ഉയരം, കോപ്റ്ററിന് പരമാവധി പറക്കാവുന്ന ഉയരം തുടങ്ങിയ മാനദണ്ഡങ്ങളിൽ അഗസ്റ്റ വെസ്റ്റ്‌ലാൻഡിന് കരാർ കിട്ടുന്ന വിധത്തിൽ വിട്ടുവീഴ്ചകളുണ്ടായി. കരാറുമായി ബന്ധപ്പെട്ട് 2005 മാര്‍ച്ച് മുതല്‍ നടന്ന ചര്‍ച്ചകളില്‍ ശര്‍മ്മ പങ്കാളിയായിരുന്നു. ഹെലികോപ്ടറിന്റെ പറക്കല്‍ ഉയരം 6000 മീറ്റില്‍ നിന്ന് 4500 മീറ്ററായി ചുരുക്കിയത് ഇദ്ദേഹം ഉള്‍പ്പെട്ട ചര്‍ച്ചകളിലാണെന്നാണ് റിപ്പോര്‍ട്ട്. ഈ സമയം പ്രതിരോധ മന്ത്രാലയത്തില്‍ വ്യോമയാന വിഭാഗത്തില്‍ ജോയിന്റ് സെക്രട്ടറിയായിരുന്നു ശര്‍മ്മ.
വ്യോമയാന ഉപമേധാവിയായിരുന്ന ജെ.എസ് ഗുജ്‌റാള്‍ അധ്യക്ഷനായി 2005 മാര്‍ച്ച് 27ന് നടന്ന യോഗത്തില്‍ ശര്‍മ്മ അടക്കം മന്ത്രാലയത്തിലെയും വ്യോമസേനയിലെയും നിരവധി പ്രമുഖര്‍ പങ്കെടുത്തിരുന്നു. വിംഗ് കമാന്‍ഡറായിരുന്ന എസ്.എ കുന്ദെ അടക്കമുള്ളവര്‍ ചര്‍ച്ചയില്‍ പങ്കാളികയായിരുന്നു. ധനമന്ത്രാലയത്തില്‍ നിന്നുള്ള അനുമതി കിട്ടിയതോടെ 2010 ഫെബ്രുവരിയില്‍ ഇവര്‍ കരാറില്‍ ഒപ്പുവച്ചു. എന്നാല്‍ വിവാദങ്ങള്‍ ഉയര്‍ന്നതോടെ 2014 ജനുവരിയില്‍ കരാര്‍ റദ്ദാക്കുകയായിരുന്നു.
