അമേരിക്കൻ സൈനിക വിവരങ്ങൾ നാലുവർഷമായി ചൈന ചോർത്തുന്നുണ്ടെന്ന് വെളിപ്പെടുത്തൽ. അമേരിക്കൻ ഭരണകൂടത്തിലെ ഒരു ഉന്നത ഉദ്യോഗസ്ഥനാണ് ഗുരുതരമായ വെളിപ്പെടുത്തൽ നടത്തിയത്. ചൈന ഇതിനായുള്ള സംവിധാനങ്ങൾ ഒരുക്കിയിരിക്കുന്നത് ക്യൂബയിലാണെന്നതാണ് വെളിപ്പെടുത്തൽ. കുറഞ്ഞത് നാലുവര്ഷമെങ്കിലുമായി ഇത് പ്രവര്ത്തിച്ചുവരുന്നുവെന്നും പേര് വെളിപ്പെടുത്താനാഗ്രഹിക്കാത്ത ഉദ്യോഗസ്ഥന് അന്തര്ദേശീയ മാധ്യമത്തോട് പറഞ്ഞു. ഇത് അമേരിക്കന് ഇന്റലിജന്സിന്റെ ശ്രദ്ധയില്പ്പെട്ടിട്ടുണ്ടെന്നും അദ്ദേഹം വ്യക്തമാക്കി.
2019 മുതൽ ചൈനീസ് ചാരനിരീക്ഷണകേന്ദ്രം ക്യൂബയിൽ പ്രവര്ത്തിക്കുന്നുണ്ട്. ഇതിന് കൃത്യമായ രേഖകളും തെളിവുകളുമുണ്ട്. ചാരനിരീക്ഷണം വ്യാപിപ്പിക്കാനുള്ള ചൈനയുടെ നടപടികളെ ബൈഡന് ഭരണകൂടം ചെറുക്കുന്നുണ്ട്. നയതന്ത്രബന്ധങ്ങളിലൂടെയും ചിലത് വെളിപ്പെടുത്താന് കഴിയാത്ത മറ്റു നടപടികളിലൂടെയും ഇത്തരം നടപടികള് മുന്നോട്ട് പോകുന്നതായും അദ്ദേഹം വ്യക്തമാക്കി. ക്യൂബയില് ചൈനീസ് ചാരകേന്ദ്രം സ്ഥാപിക്കാന് ഇരുരാജ്യങ്ങളും തമ്മില് ധാരണയിലെത്തിയെന്ന വാള്സ്ട്രീറ്റ് ജേണല് വാര്ത്ത പുറത്തുവന്നതിന് പിന്നാലെയാണ് അമേരിക്കന് ഭരണകൂടത്തിലെ ഉദ്യോഗസ്ഥന്റെ സ്ഥിരീകരണം. പദ്ധതിയുമായി ബന്ധമുള്ള ഉദ്യോഗസ്ഥരെ ഉദ്ധരിച്ചായിരുന്നു വാള്സ്ട്രീറ്റ് ജേണലിന്റെ റിപ്പോര്ട്ട്. ഇതിനായി ശതകോടിക്കണക്കിനു ഡോളര് ചൈന ക്യൂബയ്ക്ക് സഹായമായി നല്കിയെന്നും വെളിപ്പെടുത്തലുണ്ടായിരുന്നു. മാസങ്ങൾക്ക് മുമ്പാണ് അമേരിക്കൻ ആകാശത്തുകൂടെ പരന്ന ചൈനീസ് ചാര ബലൂണുകൾ അമേരിക്ക വെടിവച്ചിട്ടത്. എന്നാൽ ഈ വെളിപ്പെടുത്തൽ അമേരിക്കൻ, ക്യൂബൻ സർക്കാരുകൾ തള്ളി. അപവാദപ്രചാരണം അമേരിക്കയുടെ സ്ഥിരം തന്ത്രമാണെന്ന് ചൈനീസ് വിദേശകാര്യമന്ത്രാലയത്തിന്റെ വക്താവ് വാങ് വെന്ബിനും പ്രതികരിച്ചു.
