നെയ്യാറ്റിൻകരയിൽ കോളറ ബാധ സ്ഥിരീകരിച്ചതോടെ പ്രതിരോധ പ്രവർത്തനങ്ങൾ ശക്തമാക്കാൻ ആരോഗ്യവകുപ്പിന്റെ നിർദേശം. വഴുതൂരിൽ പ്രവർത്തിക്കുന്ന ശ്രീകാരുണ്യ സ്പെഷ്യൽ സ്കൂളിലെ ഹോസ്റ്റലിൽ കോളറബാധ സ്ഥിരീകരിച്ചതോടെ ഹോസ്റ്റൽ അന്തേവാസിയായ യുവാവ് വയറിളക്കം ബാധിച്ച് മരിച്ചതിനുപിന്നാലെ ഒപ്പം താമസിക്കുന്ന കുട്ടിക്ക് കോളറ സ്ഥിരീകരിച്ചിരുന്നു. 2017-നുശേഷം ഇതാദ്യമായാണ് സംസ്ഥാനത്ത് കോളറ ബാധിച്ച് മരണം റിപ്പോർട്ട് ചെയ്യുന്നത്. സ്ഥാപനത്തിലെ 17 പേർ വയറിളക്കം ബാധിച്ച് ചികിത്സയിലാണ്. ഇവർക്ക് കോളറ പ്രതിരോധ മരുന്ന് നൽകിത്തുടങ്ങിയിട്ടുണ്ട്.
ജില്ലാ മെഡിക്കല് ഓഫീസറുടെ നേതൃത്വത്തില് സ്ഥലത്ത് പ്രതിരോധ പ്രവര്ത്തനങ്ങള് ഊര്ജിതമാക്കി. ആരോഗ്യമന്ത്രിയുടെ നിര്ദേശത്തെ തുടര്ന്ന് ആരോഗ്യ വകുപ്പ് അഡീഷണല് ഡയറക്ടര് സ്ഥലം സന്ദര്ശിച്ച് സ്ഥിതിഗതികള് വിലയിരുത്തി.രോഗലക്ഷണങ്ങള് കാണുന്നവരുടെ സാമ്പിളുകള് എത്രയും വേഗം പരിശോധനയ്ക്കയയ്ക്കാനും മന്ത്രി നിര്ദേശം നല്കി.
“കൂടുതല് രോഗികള് എത്തുന്നുണ്ടെങ്കില് ഐരാണിമുട്ടത്തെ ഐസൊലേഷന് വാര്ഡില് പ്രവേശിപ്പിച്ച് വിദഗ്ധ പരിചരണം ഉറപ്പാക്കും. കെയര് ഹോമിലുള്ള ചിലര് വീടുകളില് പോയതിനാല് അവരെ കണ്ടെത്തി നിരീക്ഷിക്കും. അവര്ക്കോ കുടുംബാംഗങ്ങള്ക്കോ രോഗലക്ഷണങ്ങള് കണ്ടാല് സാമ്പിളുകള് പരിശോധിക്കുകയും ചികിത്സ ഉറപ്പാക്കുകയും ചെയ്യും. സ്ഥാപനത്തിന്റെ തന്നെ സ്കൂളിലെ ചില കുട്ടികള്ക്ക് കോളറ ലക്ഷണങ്ങള് കണ്ടതിനാല് അവര്ക്കും വിദഗ്ധ പരിചരണം ഉറപ്പാക്കി. സ്കൂളിലും പ്രതിരോധ പ്രവര്ത്തനങ്ങള് ശക്തമാക്കിയിട്ടുണ്ട്. കോളറ പ്രതിരോധത്തിന് അവബോധം വളരെ പ്രധാനമാണ്. ശക്തമായ വയറിളക്കമോ ഛര്ദിലോ നിര്ജലീകരണത്തിന്റെ ലക്ഷണങ്ങളോ ഉണ്ടെങ്കില് അടിയന്തരമായി ചികിത്സ തേടേണ്ടതാണെന്നും കോളറ രോഗത്തിനെതിരെ വളരെ ഫലപ്രദമായ ആന്റിബയോട്ടിക് മരുന്നുകളുണ്ട് .”- ആരോഗ്യമന്ത്രി പറഞ്ഞു.
സാധാരണയായി മലിനമായ വെള്ളവും ഭക്ഷണവും വഴിയാണ് കോളറ പടരുന്നത്. രോഗാണുക്കള് ശരീരത്തിലെത്തി ഏതാനും മണിക്കൂറുകള് മുതല് 5 ദിവസത്തിനുള്ളില് രോഗം വരാവുന്നതാണ്.
പെട്ടെന്നുള്ള കഠിനമായതും വയറുവേദനയില്ലാത്തതും വെള്ളം പോലെയുള്ള വയറിളക്കമാണ് കോളറയുടെ രോഗലക്ഷണം. മിക്കപ്പോഴും ഛര്ദ്ദിയുമുണ്ടായിരിക്കും. ഇതേതുടര്ന്ന് രോഗി പെട്ടെന്ന് തന്നെ നിര്ജ്ജലീകരണത്തിലേക്കും കുഴഞ്ഞ അവസ്ഥയിലേക്കും എത്താം. ശരിയായ ചികിത്സ ലഭിച്ചില്ലെങ്കില് പെട്ടെന്ന് രോഗം ഗുരുതരമാകും.രോഗം ഗുരുതരവും മരണകാരണവുമാകുന്നത് നിര്ജ്ജലീകരണം കൊണ്ടാണ്. ആയതിനാല് അടിസ്ഥാനപരമായി മറ്റേതൊരു വയറിളക്ക രോഗചികിത്സയെയും പോലെ തന്നെയാണ് കോളറ ചികിത്സയും. ആരംഭം മുതല് ഒആര്എസ് ലായനി ഉപയോഗിച്ചുളള പാനീയ ചികിത്സയിലൂടെ ഗുരുതരാവസ്ഥ കുറയ്ക്കാനും മരണം ഒഴിവാക്കാനും സാധിക്കും.
കോളറ പ്രതിരോധത്തിനായി ശ്രദ്ധിക്കേണ്ട കാര്യങ്ങൾ
തിളപ്പിച്ചാറ്റിയ വെള്ളം മാത്രം കുടിക്കുക
ഭക്ഷണവും വെള്ളവും തുറന്ന് വയ്ക്കരുത്
ഭക്ഷ്യവസ്തുക്കള് നന്നായി വേവിച്ച് മാത്രം കഴിക്കുക
പഴങ്ങളും പച്ചക്കറികളും ശുദ്ധജലത്തില് നന്നായി കഴുകി മാത്രം ഉപയോഗിക്കുക
മലമൂത്ര വിസര്ജനത്തിന് ശേഷവും ആഹാരം കഴിക്കുന്നതിന് മുമ്പും സോപ്പ് ഉപയോഗിച്ച് കൈകള് കഴുകുക
വയറിളക്കമോ ഛര്ദ്ദിയോ ഉണ്ടായാല് ധാരാളം പാനീയം കുടിയ്ക്കുക
എത്രയും വേഗം വിദഗ്ധ ചികിത്സ തേടുക.
