ദില്ലി: റഫാല് ഇടപാടില് മോദി സര്ക്കാരിന് ക്ലീന് ചിറ്റ് നല്കിയ സുപ്രീം കോടതി നടപടിക്കെതിരെയുള്ള പുനഃപരിശോധനാ ഹര്ജികളില് നാളെ വിധി പറയും. ശബരിമല യുവതീപ്രവേശ വിഷയത്തിലെ നിര്ണായക വിധിക്കു പുറമെയാണു റഫാലിലും സുപ്രീം കോടതി ഇതേ ദിവസം തന്നെ വിധി പറയുക. റഫാല് ഇടപാടില് അന്വേഷണം വേണ്ടെന്ന സുപ്രീം കോടതി നിര്ദേശത്തിനെതിരെയായിരുന്നു പുനഃപരിശോധനാ ഹര്ജികള് എത്തിയത്.
കോടതിക്ക് തെറ്റായ വിവരങ്ങള് നല്കിയതിന് ഉത്തരവാദികളായ ഉദ്യോഗസ്ഥര്ക്കെതിരെ കള്ളസാക്ഷ്യത്തിനു നടപടി വേണമെന്നും ആവശ്യമുയര്ന്നു. ഫ്രഞ്ച് കമ്പനിയായ ഡാസോ ഏവിയേഷനില്നിന്നു 36 വിമാനങ്ങള് വാങ്ങാനുള്ള കരാറില് അഴിമതി നടന്നുവെന്ന ആരോപണത്തില് അന്വേഷണം ആവശ്യമില്ലെന്നായിരുന്നു സുപ്രീം കോടതി വിധി. റഫാല് വിഷയത്തെക്കുറിച്ച് ഇല്ലാത്ത സിഎജി റിപ്പോര്ട്ട് ഉണ്ടെന്നും അതു പാര്ലമെന്റിന്റെ പബ്ലിക് അക്കൗണ്ട്സ് കമ്മിറ്റി പരിശോധിച്ചെന്നുമാണ് ഡിസംബറിലെ വിധിയില് കോടതി പറഞ്ഞത്.
ഇതിനെതിരെ മുന്കേന്ദ്രമന്ത്രിമാരുമായ യശ്വന്ത് സിന്ഹ, അരുണ് ഷൂറി, മുതിര്ന്ന അഭിഭാഷകന് പ്രശാന്ത് ഭൂഷണ്, എന്നിവരാണു പുനഃപരിശോധനാ ഹര്ജികള് സമര്പ്പിച്ചത്. മേയില് വാദം കേട്ട ചീഫ് ജസ്റ്റിസ് രഞ്ജന് ഗൊഗൊയ് അധ്യക്ഷനായ മൂന്നംഗ ബെഞ്ച് വിധി പറയാന് മാറ്റിവയ്ക്കുകയായിരുന്നു.
