തിരുവനന്തപുരം :കാട്ടാക്കടയിൽ ഒരാൾക്ക് ഷിഗെല്ല രോഗബാധ സ്ഥിരീകരിച്ചതിന് പിന്നാലെ പ്രദേശത്തെ ബേക്കറിയിൽ നിന്ന് ശേഖരിച്ച ജ്യൂസ് സാംപിളിലും മാരകമായ ഷിഗെല്ല ബാക്ടീരിയയുടെ സാന്നിധ്യം കണ്ടെത്തി.
ഭക്ഷ്യസുരക്ഷാ വകുപ്പ് നടത്തിയ കർശനമായ പരിശോധനയിലാണ് ജ്യൂസിൽ ബാക്ടീരിയയുടെ സാന്നിധ്യം സ്ഥിരീകരിച്ചത്. ഇതേത്തുടർന്ന് അധികൃതർ അടിയന്തര നടപടിയെന്നോണം ഈ ബേക്കറി താൽക്കാലികമായി അടപ്പിച്ചു.
മേയ് 29-നാണ് ഭക്ഷ്യസുരക്ഷാ വിഭാഗം ഉദ്യോഗസ്ഥർ കാട്ടാക്കടയിലെ ബേക്കറിയിൽ നിന്ന് ഓറഞ്ച് ഫ്ലേവറിലുള്ള ജ്യൂസിന്റെ സാംപിൾ ശേഖരിച്ച് വഞ്ചിയൂരിലെ സർക്കാർ ലാബിൽ പരിശോധനയ്ക്കായി എത്തിച്ചത്. പ്രാദേശികമായി തയാറാക്കിയ ഈ പാനീയത്തിന്റെ പരിശോധനാ ഫലം പുറത്തുവന്നപ്പോഴാണ് ഇതിൽ ഷിഗെല്ല ബാക്ടീരിയ അടങ്ങിയിട്ടുണ്ടെന്ന് വ്യക്തമായത്.
രോഗവ്യാപന സാധ്യത കണക്കിലെടുത്ത് ഉദ്യോഗസ്ഥർ ഉടൻ തന്നെ സ്ഥലത്തെത്തി ബേക്കറിയുടെ പ്രവർത്തനം തടയുകയായിരുന്നു. പ്രദേശത്ത് കൂടുതൽ പ്രതിരോധ നടപടികളും ആരോഗ്യവകുപ്പിന്റെ നിരീക്ഷണവും ശക്തമാക്കിയിട്ടുണ്ട്.
