തിരുവനന്തപുരം: സംസ്ഥാനത്ത് കോവിഡ് പോസിറ്റീവായ ജീവനക്കാരില് വര്ക്ക് ഫ്രം ഹോം സൗകര്യമുള്ളവര്ക്ക് ഇനി മുതൽ കോവിഡ് സ്പെഷ്യൽ ലീവ് നൽകില്ല. അവര്ക്ക് ഏഴ് ദിവസം വര്ക്ക് ഫ്രം ഹോം അനുവദിക്കണമെന്ന് സര്ക്കാര് പുറത്തിറക്കിയ പുതിയ ഉത്തരവില് അറിയിച്ചു.
സംസ്ഥാനത്ത് കോവിഡ് ഒമിക്രോണ് വ്യാപനം രൂക്ഷമായ സാഹചര്യത്തിലായിരുന്നു സര്ക്കാര്, അര്ധ സര്ക്കാര്, പൊതു സ്ഥാപനങ്ങള്, സ്വകാര്യ സ്ഥാപനങ്ങള് എന്നിവടങ്ങളിലെ ജീവനക്കാർക്ക് കോവിഡ് പോസിറ്റീവ് ആയാല് സ്പെഷ്യൽ ലീവ് അനുവദിച്ചിരുന്നത്.
വര്ക്ക് ഫ്രം ഹോം സൗകര്യമില്ലാത്ത ജീവനക്കാര്ക്ക് അഞ്ച് ദിവസത്തെ സ്പെഷല് ലീവ് ഫോര് കോവിഡ് അവധി ദിവസങ്ങള് ഉള്പ്പെടെ അനുവദിക്കാം. അഞ്ചു ദിവസം കഴിഞ്ഞ് ആന്റിജൻ പരിശോധനയിൽ നെഗറ്റീവ് ആയാല് എല്ലാ കോവിഡ് മാനദണ്ഡങ്ങളും കൃത്യമായി പാലിച്ച് ഓഫിസില് ഹാജരാകേണ്ടി വരും. അഞ്ചു ദിവസം കഴിഞ്ഞു നെഗറ്റീവ് ആയില്ലെങ്കില് മാത്രം രണ്ട് ദിവസം കൂടി ലീവ് എടുക്കാം. ഇതിനുശേഷം ഉടൻ തന്നെ ഓഫിസില് ഹാജരാകണമെന്നും ഉത്തരവിൽ പറയുന്നു.