കൊല്ലം: അഞ്ചലില്‍ കിടപ്പ് രോഗികളുടെ ക്ഷേമ പെന്‍ഷനില്‍ നിന്ന് നിര്‍ബന്ധമായി പണം പിരിച്ച സംഭവത്തില്‍ ആരോപണ വിധേയനായ സിപിഐ വാര്‍ഡ് മെമ്പര്‍ വര്‍ഗീസിന് അന്വേഷണ വിധേയമായി സസ്പെന്‍ഷന്‍. സിപിഐ ജില്ലാ അസിസ്റ്റന്റ് സെക്രട്ടറി പിഎസ് സുപാല്‍ ഉള്‍പ്പടെയുള്ളവര്‍ പങ്കെടുത്ത യോഗത്തിലാണ് തീരുമാനം.
ആരോപണം അന്വേഷിക്കാന്‍ മൂന്നംഗ സമിതിയെ പാര്‍ട്ടി ചുമതലപ്പെടുത്തി. ജനുവരി 15ന് മുന്‍പ് വിശദമായ റിപ്പോര്‍ട്ട് സമര്‍പ്പിക്കണം. അന്വേഷണ സംഘം റിപ്പോര്‍ട്ട് സമര്‍പ്പിക്കുന്നതിനനുസരിച്ച് തുടര്‍നടപടികള്‍ സ്വീകരിക്കും.
ഇന്നലെയാണ് കൊല്ലം ജില്ലയിലുള്ള അഞ്ചല്‍ പഞ്ചായത്തിലെ പത്താം വാര്‍ഡില്‍ നിന്ന് സിപിഐ അനധികൃത പണപ്പിരിവ് നടത്തിയെന്ന ആരോപണം പുറത്തുവന്നത്. കിടപ്പ് രോഗികള്‍ ഉള്‍പ്പടെയുള്ളവരെ ചട്ടവിരുദ്ധമായി വിളിച്ചു വരുത്തി 100 രൂപ വീതം നിര്‍ബന്ധമായി പാര്‍ട്ടി ഫണ്ടിലേക്ക് പിരിച്ചു എന്നതാണ് ആരോപണം.
