തിരുവനന്തപുരം: സി പി എം (CPM) സംസ്ഥാന സമ്മേളന തീയതികള്‍ മാറ്റേണ്ടതില്ലെന്ന് പാര്‍ട്ടി സെക്രട്ടേറിയറ്റ് തീരുമാനം. സമ്മേളനം മാര്‍ച്ച് ഒന്ന് മുതല്‍ നാല് വരെ എറണാകുളം ജില്ലയില്‍ നടത്തും. സംസ്ഥാന സമ്മേളനത്തിന്റെ ഭാഗമായി പ്രതിനിധി സമ്മേളനം, സെമിനാര്‍ എന്നിവ ഇതിന്റെ ഭാഗമായി നടത്തും. പ്രതിനിധി സമ്മേളനത്തില്‍ പങ്കെടുക്കുന്നവര്‍ ആര്‍ടിപിസിആര്‍ ടെസ്റ്റ് നടത്തണം.
ഫെബ്രുവരി 13,14 തീയതികളിൽ സമ്മേളന നടത്തിപ്പിന് ആവശ്യമായ പണം ജനങ്ങളിൽ നിന്നും പിരിവെടുക്കും. ഫെബ്രുവരി 21 നാണ് പതാകദിനമായി ആചരിക്കുക. നടത്താന്‍ അവശേഷിക്കുന്ന ആലപ്പുഴ ജില്ലാ സമ്മേളനം ഫെബ്രുവരി 15,16 തീയതികളിലായി നടക്കും. കണ്ണൂരിൽ നടത്താൻ പോകുന്ന 23ാം പാർട്ടി കോൺഗ്രസിൽ അവതരിപ്പിക്കുന്ന കരട് രാഷ്‌ട്രീയ പ്രമേയത്തിൽ പാർട്ടിയിലെ അംഗങ്ങൾക്കും പൊതുജനങ്ങൾക്കും അഭിപ്രായങ്ങൾ പാർട്ടി കേന്ദ്ര കമ്മിറ്റിയെ അറിയിക്കാം. സംസ്ഥാന സമ്മേളനത്തിന് പ്രകടനം ഉണ്ടാകില്ല. പൊതു സമ്മേളനത്തിൽ ആളുകളുടെ എണ്ണവും നിയന്ത്രിക്കും.
