തിരുവനന്തപുരം: സംസ്ഥാനത്ത് പോക്സോ കേസുകള് അന്വേഷിക്കാൻ പ്രത്യേക പോലീസ് സംഘത്തെ രൂപീകരിക്കുന്നു. ഡിവൈഎസ്പിമാരുടെ നേതൃത്വത്തിലായിരിക്കും ഓരോ ജില്ലയിലും പ്രത്യേക സംഘത്തെ രൂപീകരിക്കുക. 44 സ്റ്റേഷൻ ഹൗസ് ഓഫീസർമാരെ ക്രമസമാധാന ചുമതലയിൽ നിന്നും പോക്സോ സംഘത്തിലേക്ക് പുനർവിന്യസിക്കാനും തീരുമാനിച്ചു.
സംസ്ഥാനത്തെ പോക്സോ കേസുകളുൾ ഊർജ്ജിതമായി അന്വേഷിക്കുവാനാണ് പ്രത്യേക സംഘം രൂപീകരിക്കുന്നത്. പോക്സോ കേസുകളിൽ കുറ്റപത്രവും വിചാരണയുമെല്ലാം വൈകുന്നത് ചൂണ്ടികാട്ടി പ്രത്യേക സംഘങ്ങളെ രൂപീകരിക്കാൻ ഒരു വർഷം മുമ്പ് സുപ്രീം കോടതിയും നിർദേശിച്ചിരുന്നു. സിഐ റാങ്കിലുളള സ്റ്റേഷൻ ഹൗസ് ഓഫീസർമാരാണ് പോക്സോ കേസുകള് അന്വേഷിക്കുന്നത്.
പുതിയ സംഘം രൂപീകരിക്കാനുള്ള തസ്തികകളില്ലാത്തിനാൽ പ്രത്യേക സംഘത്തിൻെറ രൂപീകരണം ചർച്ചകളിൽ മാത്രം ഒതുങ്ങി. പ്രതിവർഷം 500ൽ താഴെ കേസുകള് രജിസ്റ്റർ ചെയ്യുന്ന സ്റ്റേഷനുകളുടെ ചുമതയിൽ നിന്നും ഇൻസ്പെക്ടർമാരെ ഒഴിവാക്കാൻ ഇപ്പോള് തീരുമാനിച്ചതോടെയാണ് പോക്സോ പ്രത്യേക സംഘത്തിൻെറ രൂപീകരണം സാധ്യമാകുന്നത്.
