തിരുവനന്തപുരം: ദേശാഭിമാനി വാരാന്തപ്പതിപ്പിലെ ലേഖന വിവാദവുമായി ബന്ധപ്പെട്ട വിവാദങ്ങൾക്ക് പിന്നാലെ നടപടിയുമായി മാനേജ്‌മെന്റ്. വാരാന്തപ്പതിപ്പ് എഡിറ്ററുടെ ചുമതലയിൽ നിന്ന് കെ.ആർ. അജയനെ നീക്കി. പകരം ടി. ചന്ദ്രമോഹനനാണ് വാരാന്തപ്പതിപ്പിന്റെ പുതിയ ചുമതല നൽകിയിരിക്കുന്നത്. സർവീസിൽ നിന്ന് വിരമിക്കാൻ ദിവസങ്ങൾ മാത്രം ബാക്കി നിൽക്കെയാണ് അജയനെതിരെ പാർട്ടി പത്രത്തിന്റെ അച്ചടക്ക നടപടി ഉണ്ടായിരിക്കുന്നത്.
‘കള്ളൻ വിജയൻ, ധന്യ നാടക ഗ്രാമം, മുത്തിപ്പാറ പി.ഒ.’ എന്ന ലേഖനത്തിന്റെ തലക്കെട്ടുമായി ബന്ധപ്പെട്ട തർക്കമാണ് വാരാന്തപ്പതിപ്പ് അച്ചടി മുടങ്ങുന്നതിലേക്കും തുടർ നടപടികളിലേക്കും നയിച്ചത്. പുല്ലമ്പാറയിലെ പ്രശസ്ത നാടകപ്രവർത്തകൻ വിജയനെക്കുറിച്ച് ടി.സി. രാജേഷ് എഴുതിയ ലേഖനത്തിന്റെ തലക്കെട്ടിൽ പാർട്ടി വിരുദ്ധമായി ഒന്നുമില്ലെന്ന നിലപാടിലായിരുന്നു വാരാന്തപ്പതിപ്പ് എഡിറ്റർ കെ.ആർ. അജയൻ. എഡിറ്റോറിയൽ ബോർഡിലെ ചില അംഗങ്ങൾ തലക്കെട്ട് മാറ്റാൻ ആവശ്യപ്പെട്ടെങ്കിലും അജയൻ അതിന് തയ്യാറായില്ല. തുടർന്ന് റസിഡന്റ് എഡിറ്റർ നൽകിയ കാരണം കാണിക്കൽ നോട്ടീസിനും തലക്കെട്ട് അനുയോജ്യമാണെന്ന സമാന മറുപടിയാണ് അദ്ദേഹം നൽകിയത്. ഇതിനുപുറമെ, വിഷയവുമായി ബന്ധപ്പെട്ട വിവരങ്ങൾ മാധ്യമങ്ങൾക്ക് ചോർത്തി നൽകിയെന്ന ആരോപണവും അജയനെതിരെ ഉയർന്നിരുന്നു.
അതേസമയം, തികച്ചും സാധാരണമായ ഒരു തലക്കെട്ടിന്റെ പേരിൽ പത്രത്തിൽ വലിയ തർക്കങ്ങൾ ഉയർന്നതും വാരാന്തപ്പതിപ്പ് പിൻവലിക്കേണ്ടി വന്നതും സിപിഎമ്മിനുള്ളിൽ വലിയ അമർഷത്തിന് ഇടയാക്കിയിട്ടുണ്ട്. കേന്ദ്ര കമ്മിറ്റി അംഗം പുത്തലത്ത് ദിനേശൻ ചീഫ് എഡിറ്ററും സംസ്ഥാന സെക്രട്ടേറിയറ്റ് അംഗം എം. സ്വരാജ് റസിഡന്റ് എഡിറ്ററുമായിരിക്കെ പത്രത്തിലുണ്ടായ ഈ ഏകോപനമില്ലായ്മയും നയപരമായ വീഴ്ചയും പാർട്ടിക്കുള്ളിൽ കടുത്ത വിമർശനത്തിനാണ് വഴിവെച്ചിരിക്കുന്നത്. തർക്കത്തിനിടയാക്കിയ ലേഖനം പിന്നീട് എഴുത്തുകാരൻ അതേ തലക്കെട്ടോടെ സാമൂഹിക മാധ്യമങ്ങളിൽ പങ്കുവെച്ചിരുന്നു.
