മഹാരാഷ്ട്രയിലെ സഖ്യസർക്കാരിനെ വെല്ലുവിളിച്ച് ബിജെപി നേതാവ് ദേവേന്ദ്ര ഫഡ്നവിസ്. മഹാരാഷ്ട്രയിൽ ഇപ്പോൾ തിരഞ്ഞെടുപ്പ് നടത്തിയാൽ ബിജെപി ഒറ്റയ്ക്ക് അധികാരത്തിലെത്തുമെന്നും ഫഡ്നവിസ് അഭിപ്രായപ്പെട്ടു. ഭാവിയിൽ മഹാരാഷ്ട്രയിൽ ആരുമായും സഖ്യത്തിന്റെ ആവശ്യമില്ലെന്ന ബിജെപി ദേശീയ അദ്ധ്യക്ഷൻ ജെ പി നഡ്ഡയുടെ പ്രഖ്യാപനത്തിന് പിന്നാലെയാണ് ഫഡ്നവിസിന്റെ വെല്ലുവിളി.
വരുന്ന തിരഞ്ഞെടുപ്പുകളിൽ മഹാരാഷ്ട്രയിൽ ഒരു വശത്ത് ബിജെപിയും മറുവശത്ത് മറ്റ് പാർട്ടികളുമായിരിക്കുമെന്നും പ്രത്യശാസ്ത്ര വിരുദ്ധമായ അവിശുദ്ധ സഖ്യങ്ങളെ വിജയകരമായി അതിജീവിക്കാൻ ബിജെപിക്ക് സാധിക്കുമെന്നും നഡ്ഡ അഭിപ്രായപ്പെട്ടിരുന്നു.
മഹാരാഷ്ട്രയിലെ സഖ്യസർക്കാരിനെ അട്ടിമറിക്കാൻ ബിജെപി ശ്രമിക്കുകയാണെന്നും വരുന്ന ഏപ്രിൽ മാസത്തിൽ സംസ്ഥാനത്ത് ‘ഓപ്പറേഷൻ ലോട്ടസ്‘ പ്രാവർത്തികമാക്കാൻ രാജ്യം ഭരിക്കുന്ന പാർട്ടി നീക്കം നടത്തുകയാണെന്നും മഹാരാഷ്ട്ര മുഖ്യമന്ത്രിയും ശിവസേന നേതാവുമായ ഉദ്ധവ് താക്കറെ നേരത്തെ ആരോപിച്ചിരുന്നു.
