ബംഗളുരു: ചൈനീസ് ലോൺ ആപ്പ് തട്ടിപ്പ് കേസുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റ് (ഇഡി) ബംഗളൂരുവിലെ അഞ്ച് സ്ഥാപനങ്ങളിൽ റെയ്ഡ് നടത്തി. റെയ്ഡിനെ തുടർന്ന് 78 കോടി രൂപയുടെ നിക്ഷേപങ്ങൾ മരവിപ്പിച്ചതായി എൻഫോഴ്സ്മെന്റ് ഡയറക്ടറേറ്റ് അറിയിച്ചു .കള്ളപ്പണം വെളുപ്പിക്കൽ നിരോധന നിയമത്തിന്റെ (പിഎംഎൽഎ) വകുപ്പുകൾ പ്രകാരമാണ് റെയ്ഡ്. ബംഗളൂരു സിറ്റി സൈബർ ക്രൈം പോലീസ് സ്‌റ്റേഷൻ രജിസ്‌റ്റർ ചെയ്‌ത 18 എഫ്‌ഐആറുകളുടെ അടിസ്ഥാനത്തിലാണ് കേസ്.
മൊബൈൽ ആപ്പുകൾ വഴി ചെറിയ തുക വായ്‌പ്പയെടുത്തവരെ പോലും ദ്രോഹിച്ചതുമായി ബന്ധപ്പെട്ടാണ് വിവിധ സ്ഥാപനങ്ങൾക്കും വ്യക്തികൾക്കുമെതിരെ കേസ് എടുത്തത്. അന്വേഷണത്തിൽ, ഈ സ്ഥാപനങ്ങൾ നിയന്ത്രിക്കുന്നതും പ്രവർത്തിപ്പിക്കുന്നതും ചൈനീസ് പൗരന്മാരാണെന്ന് തെളിഞ്ഞതായി ഇഡി അറിയിച്ചു.
ഇന്ത്യക്കാരുടെ വ്യാജ രേഖകൾ ഉപയോഗിച്ച് അവരെ ആ സ്ഥാപനങ്ങളുടെ ഡമ്മി ഡയറക്ടർമാരാക്കി കുറ്റകൃത്യങ്ങളിലൂടെ വരുമാനം ഉണ്ടാക്കുക എന്നതായിരുന്നു ഈ സ്ഥാപനങ്ങളുടെ പ്രവർത്തനരീതി. വിവിധ മർച്ചന്റ് ഐഡികളിലൂടെയും, പേയ്‌മെന്റ് ഗേറ്റ്‌വേകളിലും ബാങ്കുകളിലും ഉള്ള അക്കൗണ്ടുകളിലൂടെയും പ്രസ്‌തുത സ്ഥാപനങ്ങൾ അവരുടെ നിയമവിരുദ്ധ ബിസിനസ്‌ നടത്തുന്നതായി ഇഡി കണ്ടെത്തിയിരുന്നു.ബംഗളൂരു സെൻട്രൽ ക്രൈം ബ്രാഞ്ചിൽ നിന്ന് ലഭിച്ച അന്വേഷണത്തിന്റെയും വിവരങ്ങളുടെയും അടിസ്ഥാനത്തിലാണ് തിരച്ചിൽ നടത്തിയത്.
